Deputeti i PDK-së, që dikur ishte drejtori i Policisë së Kosovës, thotë Samedin Mehmeti, ka degraduar pozitën e drejtorit dhe gjithë institucionit.
“Drejtori ka dhënë dorëheqje sepse i është kërkuar të jap dorëheqje, ai për mu është shkarkuar. Është treguar gjatë punës së tij se nuk e ka merituar të jetë drejtor i PK-së, për shkak se ka bërë një degradim shumë të këtij institucioni në raport me politikën”, ka thënë Qalaj në ResPublika.
Ai ka thënë se dorëheqja e Mehmetit për rastin e dhunimit të një 11- vjeçare nuk qëndron.
Ish-drejtori i Policisë së Kosovës, thotë ç’do Qeveri e ministër ka pasur tendencë për të ndikuar në Polici e cila u ka rezistuar deri në ardhjen e Samedin Mehmetit.
“Gjithmonë çdo ministër ka pasur tendencë që të ketë ndikim në Polici dhe ç’do Qeveri, por Policia e Kosovës e ka pasur një farë muri që ju ka bë rezistencë politikës deri tash sa ishe ky zotriu që ka qenë drejtor deri më tani i cili më të vërtetë e ka degraduar shumë pozitën e drejtorit dhe Institucionit në tërësi”, ka thënë Qalaj.
