Zëvendëskryeministri, Besnik Bislimi ka sqaruar katër pikat për të cilat është dakorduar me Pёrfaqёsuesin e Lartё tё Bashkimit Evropian, Miroslav Lajçak në takimin e djeshëm në Bratislavë.
Lidhur me këtë, deputeti i Partisë Demokratike të Kosovës, Rashit Qalaj, vlerësoi që Qeveria Kurti është detyruar të pajtohet me këto pika.
Madje sipas tij, nga veprimet e Qeverisë Kurti mund të ketë përsëri tensione në veri, shkruan teve1.info.
“Si duket Qeveria e Kosovës është detyruar të pajtohet me ato pika. Duke e njohur Kurtin dhe Qeverinë e tij, jam shumë skeptik që nuk do të kemi përsëri skandal në veri. Po të mos ishin veprimet e gabuara të Qeverisë Kurti në pjesët veriore të vendit, as që do të diskutohej plani franko-gjerman, as që do diskutohej çështja e njohjes defacto. Të gjitha veprimet që i kanë bërë partnerët tanë, i kanë bërë pas veprimeve të gabuara të Qeverisë së Kosovës. Ne duhet ta pranojmë që si shtet kemi rënë në grackën e Serbisë”, deklaroi Qalaj në emisionin InfoNata.
Ndërkaq, sa përket mundësisë për mbajtjen e zgjedhjeve të reja në veri, pas presionit të Shteteve të Bashkuara të Amerikës dhe Bashkimit Evropian për shtensionimin e situatës në Mitrovicë të Veriut, Qalaj tha se zgjedhjet mund të mbahen vetëm nëse pajtohet Serbia dhe Lista Serbe.
“Policia e Kosovës nuk guxon kurrë të tërhiqet nga veriu”, shtoi tutje Qalaj në Tëvë1.
Ndërkaq, duke komentuar përgjimet e shefes së Grupit Parlamentar të Lëvizjes Vetëvendosje, Mimoza Kusari-Lila me Slavo Simiqin e Listës Serbe, Qalaj tha se thelbi i problemit është që kjo e fundit ka komunikuar me një njeri i cili është në kërkim nga institucionet e Kosovës për shumë krime, e më kryesorja që është në listën e zezë të ShBA-së.
