Bashkimi Evropian ka shprehur keqardhje për zhvillimet të cilat kanë çuar në vendimin për të anuluar samitin e radhës të shefave të shteteve të Ballkanit Perëndimor me Kroacinë dhe Slloveninë që është dashur të zhvillohej në muajin maj, në ishullin kroat Brijoni.
Këtë e qëndrim e paraqiti zëdhënësi i BE-së duke u përgjigjur pyetjes lidhur me vendimin e presidentit të Kroacisë, Zoran Milanoviq, për të anuluar këtë samit për shkak të deklaratave nxitëse të presidentit të Serbisë, Aleksandar Vuçiq.
BE-ja në përgjigjen e vet vë në dukje se raportet e mira ndërfqinjësore janë në thelb të procesit të integrimit të Serbisë në BE dhe ato kontribuojnë në stabilitet, pajtim dhe krijim të rrethanave për të adresuar mospajtimet bilaterale nga e kaluara.
Presidenti Milanoviq tha se kolegu i tij nga Serbia Aleksandar Vuçiq nuk është i mirëseardhur në Kroaci për shkak të deklaratave të tij të fundit, të cilat Kroacia i sheh të jenë në kundërshtim të plotë me qëllimet e procesit Brdo-Brioni, i dëmtojnë raportet ndërshtetërore dhe rrezikojnë paqen e stabilitetin në rajonin e Evropës Juglindore.
Presidenti i Serbisë Aleksandar Vuçiq dhe bashkëpunëtorët e tij vazhdimisht sulmojnë verbalisht Kroacinë duke e fajësuar për nxitje të revolucionit në Serbi me qëllim të rrëzimit të pushtetit.
Vuçiq dhe mediat e afërta me të së fundi kanë nisur një fushatë luftënxitëse kundër Kroacisë, duke akuzuar këtë shtet se qëndron prapa tentimeve për revolucion dhe shembje të pushtetit në Serbi dhe se, së bashku me Shqipërinë dhe Kosovën, Kroacia po planifikon të sulmojë Serbinë.
Nisma Brdo-Brojoni është një forum i përbashkët i iniciuar nga dy vendet e BE-së Kroacia dhe Sllovenia për t’u ndihmuar vendeve të rajonit të Ballkanit Perëndimor për integrimin e tyre në BE. Integrimin e rajonit në BE edhe Kroacia edhe Sllovenia e kanë identifikuar si interes të tyre strategjik.
Samiti i fundit Brdo-Brijon ishte zhvilluar në vjeshtë të vitit të kaluar në Tiranë ku kishin marrë pjesë të gjithë presidentët e vendeve të rajonit, përfshirë edhe presidentin e Serbisë, Vuçiq.
