“Kështu që kur të na rastisë të dëgjojmë naj deklaratë të LDKyhit që thotë se po i pëlqen populli a populli ka simpati për ta”
Kjo fjali i kushtoi me gjobë kryetarit të Lëvizjes Vetëvendosje, pas ankesës së Lidhjes Demokratike të Kosovës.
Paneli Zgjedhor për Ankesa dhe Parashtresa ka dënuar me tre mijë euro LVV-në për gjuhë fyese gjatë një tubimi më 13 janar në Pejë.
Por edhe kërkesën e LVV-së ndaj LDK-së, e ka pranuar PZAP-ja ku ka shqiptuar dënim prej 20 mijë eurosh këtë të fundit.
Subjekti politik në pushtet u ankua se një kandidate e LDK-së, Xheneta Syka, ka publikuar një video duke e krahasuar Kurtin me Hitlerin.
Ndaj këtij vendimi ka reaguar Besian Mustafa nga LDK, duke thënë se janë në fazën e shqyrtimit të vendimit.
“Partia në pushtet VV ka dështuar dhe ka dëshpëruar të gjithë Kosovën, pa vizion, pa plane, pa të ardhme. Ata bëjnë shaka me qytetarët e Kosovës në vend që të japin përgjigje e zgjidhje. Ata nuk i përgjigjen asnjë pyetjeje. Ata nuk japin asnjë vizion. Ata bëjnë vetëm shaka pa kripë në kurriz të qytetarëve të këtij vendi, e qytetarët e Kosovës meritojnë një udhëheqës që ka klan për të ardhmen e saj… Pushteti po i përbuz qytetarët, pushteti nuk ndjen se qytetarët meritojnë përgjigje, përveç shakave, që ua ofendon inteligjencën”, tha ai.
PZAP pati punë edhe me Aleancën për Ardhmërinë e Kosovës, pasi të njëjtën e dënoi me 12 mijë euro pas ankesave të LVV-së se Ramush Haradinaj, ka drejtuar akuza të pabaza dhe të pavërteta ndaj Kurtit.
E gjithë këto vendime po i sheh të drejta Melos Kolshi nga Instituti i Kosovës për Drejtësi, i cili vlerëson se gjuha e ashpër e liderëve ndikon negativisht në frymën zgjedhore.
“Andaj secili vendim nga Paneli Zgjedhor për Ankesa dhe Parashtresa duhet që të mirëpritet nga secila parti e gjithashtu nuk duhet që të shihet vetëm si një dënim financiar, por këto dënime duhet të shihen edhe si një mesazh apo një moment reflektimi që partitë politike mos t’i përsërisin më gabimet ose shkeljet e njëjta të cilat veçse janë dënuar një herë për atë çështje”, ka thënë ai.
Fushata zgjedhore zgjat deri më 8 shkurt, derisa më 9 shkurt janë zgjedhjet parlamentare.
