Në janar të këtij viti nisën punimet.
Në Stacionin e Autobusëve në qytetin e Gjilanit është duke u implementuar një projekt për shndërrimin e këtyre hapësirave në të reja.
Nga Komuna e Gjilanit vlerësojnë se objekti i ri do t’ua lehtësojë punën operatorëve por edhe udhëtarëve e qytetarëve.
“Kontrata e re është diku rreth një milion euro që kushton, komplet sipërfaqe e rrok 1 mijë e 500 metra katror, ku e kemi bodrumin i cili shërben për parkingje rreth 15 mjete, e kemi katin përdhesë për nevoja të qytetarëve dhe të stacionit ku është një restorant dhe lokale të tjera ku e kemi edhe katin e parë që shërben për zyre të administratës së stacionit të autobusave”, ka thënë Kushtrim Ibrahimi – drejtor i Shërbimeve Publike në Gjilan
Drejtori komunal jep edhe një afat se kur pritet të përfundojnë punimet.
“Në fund të vitit veç përfundon ky projekt… Jo kontrata ka afat 24 muaj, por sipas punimeve nesër kemi ditën e fundit ku kanë me u vendos edhe pllaka e fundit këtu edhe fillojmë me punë tjera që janë të parapara… Stacioni aktual ku gjindet tani është i cili i lidh edhe vijat urbane, ndër urbane, periferike, është i vetmi në Komunë të Gjilanit me këtë kapacitet, thujse i përballon nevojat e qytetarëve dhe operatorëve ekonomikë”, thotë Ibrahimi
Por këto punime i kanë shkaktuar dëme vetë Ndërrmarrjes, pasi që kjo e fundit është me vetfinancim.
“Fillimi i objektit të ri na ka penalizuar shumë, kemi dërguar shkresë te kryetari ku kemi kërkuar që me na mbulu pjesën e shpenzimeve të cilat ne nuk mund t’i marrim shkaku i prishjes së objektit ku deri më tash kemi has në vesh të shurdhër dhe nuk kemi ndihmë nga kryetari jemi të lënë anash dhe kjo është një e keqe që po na ndodhë neve përveç menaxhmentit edhe gjithë punëtorëve”, ka thënë Burhan Isufi – kryeshef i Ndërmarrjes Stacioni i Autobuësve Gjilan.
Kryeshefi tregon se janë duke u përballur me mungesë të madhe të mjeteve financiare.
“Me shkurtimin e buxhetit ne kemi pasë dhe kemi shumë vështirësi në dhënien e pagave për punëtorët ku gjysa e punëtorëve marrin pagat me vonesë, duke anashkaluar këtu menaxhmentin të cilin kemi pak konsideratë dhe i marrim me vonesë dhe ndoshta edhe hiq. Kjo është pjesa kryesore që po dëmtohen gjithmonë punëtorët, shto këtu edhe obligimet që i kemi si ndërmarrje ndaj operatorëve tjerë, shto edhe sigurimin fizik”, shprehet Isufi.
Ai tha se ekziston rreziku që në muajin tetor punëtorët të mbeten pa paga, në rast se nuk subvencionohen nga Komuna.
