Policia e Kosovës ka njoftuar se sot, më 31 mars 2026, duke filluar nga ora 20:45, në Stadiumi Fadil Vokrri do të zhvillohet ndeshja finale e play-off-it për kualifikim në Kupën e Botës 2026 ndërmjet Kosovës dhe Turqisë.
Për shkak të rëndësisë së kësaj ndeshjeje, autoritetet kanë ndërmarrë masa të shtuara sigurie në bashkëpunim me institucionet përkatëse dhe organizatorët. Do të ketë prani të shtuar të policisë brenda stadiumit, në qytet, si dhe në tri zona të dedikuara për tifozët.
Policia ka bërë të ditur se do të ketë bllokime të përkohshme të disa rrugëve kryesore në Prishtinë, përfshirë rrugët “Tring Ismajli”, “Agim Ramadani”, “Eqrem Çabej”, Bulevardin “Bill Clinton”, rrethin te Stacioni i Autobusëve, si dhe rrugën “Tirana” në drejtim të stadiumit.
Kufizime në qarkullim do të ketë edhe në zonën përreth stadiumit dhe në disa segmente të tjera gjatë lëvizjes së delegacioneve, si dhe pas përfundimit të ndeshjes.
Autoritetet u bëjnë thirrje qytetarëve që të respektojnë udhëzimet e policisë, të përdorin rrugë alternative dhe të kontribuojnë në ruajtjen e rendit dhe sigurisë publike gjatë gjithë zhvillimit të kësaj ngjarjeje sportive.
