Përfaqësuesi i sindikatës së Trafikut Urban, Ilmi Gashi, ka deklaruar se punëtorët e kësaj ndërmarrjeje po kërkojnë nga Komuna e Prishtinës që të marrë përgjegjësinë për borxhet e akumuluara ndaj Trafikut Urban.
Në ditën e dytë të protestës, Gashi kërkoi falje për ndërprerjen e shërbimeve dhe u bëri thirrje autoriteteve komunale të veprojnë për të zgjidhur situatën.
Ai ka bërë të ditur se shuma totale e borxhit arrin në 3.2 milionë euro.
“Punëtorët e ‘Trafikut Urban’, fillimisht iu kërkojmë ndjesë qytetarëve të Prishtinës, që s’po mundemi me kry shërbimet publike për shkak të mungesës së reflektimit të komunës, ku ajo po është e bazuar me të drejtë… shuma e borxhit është 3 milionë e 200 mijë euro”, tha ai.
Sipas tij, Ministria e Financave ka alokuar 3.2 milionë euro për komunën, por deri tani vetëm 600 mijë euro janë ndarë për Trafikun Urban, që nuk mbulojnë shpenzimet për naftë, paga të punëtorëve dhe sigurime shëndetësore.
Gashi theksoi se mungesa e reagimit të komunës po e vështirëson situatën e ndërmarrjes.
Ai shtoi se janë takuar me Ministrin e Financave, i cili ka premtuar se nëse Komuna ose Asambleja miraton një vendim për bartjen e të hyrave vetanake për vitin 2024, mjetet do t’i alokohen menjëherë Trafikut Urban.
“Ne jemi sektori publik i transportit. Thërrasim komunën dhe kryetarin që të dalë para punëtorëve dhe të marrë përgjegjësinë që i takon”, përfundoi Gashi.
Punëtorët e Trafikut Urban: Tatimet i kemi paguar me të ardhura tonat, naftën e kemi borxh prej muajit maj.
