Dëshmitarët dhe kontaktet me ta, ishin kryefjala e Speciales për vitin 2024.
Qysh në fillimvit, për ndikim në dëshmitarë dhe në drejtësi, Zyra e Prokurorit të Specializuar, akuzoi tre persona, Haxhi Shalën, Sabit Januzin dhe Ismet Bahtijarin.
Në këtë rast, u arrit për herë të parë në Speciale edhe marrëveshja për pranim të fajësisë.
Treshja e ndodhur në një aktakuzë të përbashkët, pranuan fajin për ndikim në dëshmitarë dhe u pajtuan për masën e dënimit.
Por, këta të tre nuk ishin të vetmit në shënjestrën e prokurorisë përsa i përket ndërhyrjeve në drejtësi.
Subjekt i hetimeve të Zyrës së Prokurorit të Specializuar, u bënë persona që vizitonin ish krerët e UÇK-së, në qendrën e paraburgimit në Hagë.
Rrjedhimisht, u kryen edhe bastisje në vendbanimet e tyre, derisa në fund i arrestuan shumicën prej tyre.
Bashkë me Bashkim Smakaj, Isni Kilaj, Fadil Fazliu, Hajredin Kuçi, nën pretendime për pengim të drejtësisë, është edhe Hashim Thaçi.
Akuzat e reja për Thaçin, vlerësohen si të pabaza.
“Njëra prej veprave me të cilat akuzohet presidenti Thaçi, është pengimi i personit zyrtar në kryerjen e detyrës zyrtare sipas nenit 401 të Kodit Penal. Element esencial i kësaj vepre penale është dhuna ose kanosja serioze. Hipotetikisht, nëse mund ta imagjinojë edhe publiku, si mund të ushtrojë dikush dhunë ose kanosje serioze për aq kohë sa është i privuar nga liria”, thotë avokati Ardian Bajraktari.
Ndërsa procesi gjyqësor kryesor i Thaçit në Speciale, ai për krime lufte, ku akuzohet bashkë me Veselin, Krasniqin e Selimin, vazhdon me dëgjimin e dëshmitarëve të prokurorisë.
Por, konsiderohet se çështja e katërshës së UÇK-së, mund të marrë epilog në fund të vitit 2025.
“Trupi gjykues ka parashikuar që prokuroria të përfundojë me dëgjimin e dëshmitarëve të saj deri në pranverën e vitit të ardhshëm dhe më pastaj, palët tjera do të kenë rastin që të rekomandojnë apo propozojnë dëshmitarë siç janë dëshmitarët e mbrojtjes, dëshmitarët e palës së dëmtuar, ku procedura në rast se shkon ashtu siç ka shkuar në këtë moment, mund të përfundojë deri kah fundi i vitit të ardhshëm”, thotë Amer Alija nga Fondi për të Drejtat Humanitare
Gjatë 2024-tës, epilog mori rasti i Pjetër Shalës, i akuzuar për krime lufte. Ai u dënua me 18 vjet burgim, dhe u urdhërua që tetë viktimat pjesëmarrëse në gjyqin e tij, t’i kompensojë me një vlerë totale prej 208 mijë euro.
Në një rast tjetër, instancat më të larta të Speciales zbutën dënimin me burgim.
Pas vendimit të Supremes, që rasti i Salih Mustafës të rikthehet në Apel, atij iu ulë dënimi në nga 22 në 15 vjet burgim.
