Në ditën e fundit të vitit, Policia e Kosovës ka lëshuar një komunikatë, ku ka paraqitur punën vjetore. Në të u tha se siguria e përgjithshme në vend ishte e qetë gjatë vitit 2024, në përjashtim të veriut ku siguria ishte e brishtë. Po ashtu nga Policia e Kosovës thanë se në këtë vit kishte më pak vrasje dhe viktima në trafik.
Me 29 nëntor, Kosova ishte përballur me një tjetër sulm terrorist.
Në Varragë të Zubin Potokut, ishte dëmtuar rëndë kanali i ujit të Ibër – Lepencit.
Reagimi i Policisë së Kosovës ishte edhe një herë në nivel.
Këta arrestuan disa të dyshuar serbë, për sulmin ndaj infrastrukturës kritike.
Ky ishte vetëm njëri nga rastet me të cilat policët kosovarë, u përballën këtë vit në veriun e vendit.
Për këtë nga ky institucion i sigurisë, në fundvit kanë thënë se situata e sigurisë në katër komunat veriore ka qenë e brishtë.
“Siguria e përgjithshme në Kosovë edhe gjatë kësaj periudhe kohore të këtij viti ka qenë e qetë, në përjashtim në veri të vendit, ku situata ka qenë e brishtë dhe e cenuar nga disa sulme kriminale e terroriste, duke veçuar sulmin terrorist ndaj Stacionit Policor në Zveqan, sulmin terrorist në objektin e Komunës së Zveqanit, sulmin terrorist ndaj infrastrukturës kritike në kanalin e Iber Lepencit në Zubin Potok, si dhe konfiskimin e një sasie të konsiderueshme të armatimit, municionit e pajisjeve të ndryshme ushtarake”.
Pavarësisht kësaj, nga Policia thonë se janë të gatshëm për të gjitha rreziqet që i kanosen vendit.
Në këtë drejtim, ata thonë se u arritën rezultate të theksuara.
Në vijim paraqesim disa nga statistikat e raportimit të krimit për këtë periudhë kohore të 2024,
– Numri i përgjithshëm i rasteve ka shënuar rëne nga 47903 në 46300 ose -3.34%
– Numri i veprave penale ka shënuar rëne nga 27560 në 26775 ose -2.38%.
– Zbulueshmëria ka shënuar rritje për 3.34%;
Statistikat Krahasuese për periudhën e 2023/2024 tregojnë rënie të rasteve dhe veprave penale në përgjithësi duke përfshi edhe veprat penale si: Lëndim i rëndë trupor, lëndim i lehtë trupor, vjedhje, vjedhje e rëndë dhe grabitje.
Nga Policia bënë të ditur se këtë vit kishte 12 vrasje më pak sesa vitin e kaluar si dhe më pak viktima në aksidentet me fatalitet.
“Siguria në trafikun rrugor gjithashtu ka qenë njëri ndër prioritetet për Policinë e Kosovës, e cila ka hartuar dhe zbatuar shumë plane operative, ka arritur të sigurojë pajisje moderne për trafik, ka realizuar fushata të ndryshme sensibilizuese me qëllim të rritjes së sigurisë në trafik dhe parandalimit të aksidenteve, ku edhe janë arritur rezultatet pozitive në vijim”.
Në fund, ata thonë se mbetën të përkushtuar të ofrojnë siguri për të gjithë qytetarët e Kosovës pa dallim, si një ndër institucionet më të besuara në vend.
