Koordinatorja Nacionale për Zgjedhje, prokurorja Laura Pula nga Gjakova, ka deklaruar se asnjë individ, pavarësisht pozitës apo funksionit që mban, nuk qëndron mbi ligjin dhe se integriteti i procesit zgjedhor mbetet i panegociueshëm për të gjithë.
Duke folur për procesin e fundit zgjedhor, Pula tha se si koordinatore, së bashku me ekipin e saj, kanë monitoruar parregullsi të shumta, të cilat janë evidentuar pas përfundimit të zgjedhjeve dhe janë raportuar pothuajse në të gjithë territorin e Kosovës.
“Gjatë procesit të fundit zgjedhor, unë si koordinatore, bashkë me ekipin tim, kemi monitoruar parregullsi të cilat janë shfaqur pas përfundimit të zgjedhjeve, të raportuara në shkallë pothuajse në të gjithë territorin e Kosovës, diku më shumë e diku më pak, dhe që janë të njohura për të gjithë”, tha Pula.
Ajo bëri të ditur se si rezultat i veprimeve të shpejta dhe të koordinuara hetimore, janë kryer arrestime, përfshirë edhe persona që shërbenin si komisionerë në qendrat e votimit, të cilët dyshohet se kanë manipuluar votat.
“Si rezultat i veprimeve të shpejta dhe të koordinuara hetimore janë kryer arrestime, duke përfshirë individë që shërbenin si komisionerë dhe që dyshohet se kanë manipuluar votat. Këto veprime nuk janë simbolike. Ato janë të bazuara në prova, janë të nxitura nga ligji dhe të ekzekutuara në përputhje me procedurat ligjore”, theksoi ajo.
Pula shtoi se Prokurori i Shtetit ka treguar profesionalizëm, paanashmëri dhe guxim institucional në trajtimin e këtyre veprave penale.
“Le të jemi të qartë: asnjë individ, pavarësisht pozitës apo funksionit, nuk qëndron mbi ligjin dhe integriteti i procesit zgjedhor është i panegociueshëm për të gjithë. Prokurori i Shtetit deri më tani ka demonstruar profesionalizëm, paanashmëri dhe guxim institucional në adresimin e këtyre veprave penale”, u shpreh ajo.
Duke folur për rëndësinë e transparencës dhe llogaridhënies, Pula tha se këto janë mjetet më të fuqishme në luftën kundër korrupsionit dhe abuzimit me pushtetin, si dhe kundër manipulimit të votës.
“Transparenca dhe llogaridhënia janë ilaçi më i fortë ndaj korrupsionit dhe abuzimit me pushtetin, sikurse edhe kundër manipulimit të votave. Veprimet tona dërgojnë një mesazh të qartë dhe të pakontestueshëm se veprat penale kundër të drejtës së votimit do të zbulohen dhe do të trajtohen sipas ligjit, përfshirë edhe rastet e falsifikimit të rezultateve të votimit”, përfundoi Pula.
