Michel ka thënë se në takimin e Këshillit Evropian në qershor është zhvilluar një diskutim strategjik mbi marrëdhëniet e Bashkimit Evropian me partnerët e tij në Evropë.
“Me pasojat dramatike të luftës së Rusisë që prek vendet evropiane në shumë fronte, ne ramë dakord të hapnim Komunitetin Politik Evropian me synimin për të bashkuar vendet në kontinentin evropian dhe për të ofruar një platformë për koordinimin politik. Ambicia është të bashkojë liderët në baza të barabarta dhe të nxisë dialogun politik dhe bashkëpunimin për çështje me interes të përbashkët, në mënyrë që, së bashku, të punojmë në forcimin e sigurisë, stabilitetit dhe prosperitetit të Evropës në tërësi”, ka shkruar ai.
Michel gjithashtu tha se gjatë takimit të nesërm krerët e shteteve do të kenë mundësinë të diskutojnë tema të tilla si paqja dhe siguria, situata ekonomike, energjia dhe klima, si dhe migrimi dhe lëvizshmëria.
“Asnjë rezultat zyrtar me shkrim i Komunitetit Politik Evropian nuk është parashikuar”, ka shkruar ai.
Në këtë letër Michelka njoftuar edhe për agjendën e takimit të nesërm.
“Në aspektin praktik, takimi, i cili do të zhvillohet në Kalanë e Pragës më 6 tetor, do të nisë me një seancë plenare hapëse nga ora 13:00 deri në orën 14:00. Më pas do të ftoheni të merrni pjesë në diskutimet e tryezave të rrumbullakëta deri rreth orës 16:00. Nga ora 16:00 deri në orën 19:00 do të keni mundësi të planifikoni takime dypalëshe. Seanca plenare përmbyllëse do të zhvillohet gjatë darkës”, ka njoftuar ai.
Gjithashtu ai ka thënë se më datën 7 tetor do të mbahet edhe një jozyrtar i krerëve të shteteve ose qeverive të BE-së.
“Ne do të takohemi më 7 tetor për takimin tonë jozyrtar. Ne do të diskutojmë tre çështjet më të ngutshme – dhe të ndërlidhura – për të gjithë ne, përkatësisht luftën e Rusisë në Ukrainë, energjinë dhe situatën ekonomike”, ka njoftuar ai.
Komuniteti Politik Evropian është platformë për koordinim politik e krijuar mbi bazën e propozimit të presidenti francez, Emmanuel Macron dhe në të cilën do të bashkohen liderët e 27 vendeve anëtare të Bashkimit Evropian (BE) dhe liderët e 17 vendeve të tjera evropiane.
Në samitin e parë të Komunitetit Politik Evropian (EPC), Kosovën do ta përfaqësojë presidentja Vjosa Osmani. /teve1.info/
