Në xhiron e 31-të të elitës së futbollit të Francës, lideri i ligës, Paris Saint-Germaini, do të luajë kundër vendit të dytë, Lensit.
Ky ballafaqim zhvillohet të shtunën në orën 21:00 dhe mund të luajë rol vendimtar për titullin e kampionit në Francë.
Para këtij dueli, trajneri i parisienëve, Christophe Galtier, është akuzuar për racizëm dhe islamofobi, akuza të cilat ai i ka mohuar kategorikisht.
56-vjeçari ka qenë në presion të madh javët e fundit për shkak të dështimit në Ligën e Kampionëve, ku u eliminua në 1/8 e finales nga Bayern Munichu muajin e kaluar.
Më pas pati dy humbje rresht në shtëpi nga Rennesi dhe Lyoni, gjë që u shfrytëzua nga Lensi, që është afruar në tabelë në vetëm gjashtë pikë.
PSG-ja lidere ka 69 pikë.
Parisi vikendin e kaluar fitoi 2:0 ndaj Nicet me golat e Lionel Messit dhe Sergio Ramosit, por do t’i duhet një tjetër sukses për të qenë më i qetë në vazhdim të kampionatit.
PSG-ja e kërkon titullin e 11-të në elitën e futbollit të Francës, që do të ishte rekord.
Deri në fund të kampionatit francez kanë mbetur edhe tetë ndeshje për t’u zhvilluar.
