Për ish krerët e UÇK-së, Hashim Thaçi, Kadri Veseli e Rexhep Selimi, janë marra masa.
Atyre iu është ndaluar vizita nga persona të paprivilegjuar, qoftë fizikisht apo me video lidhje.
“Trupi gjykues ndalon çdo vizitë te ndonjë prej tre të akuzuarve nga persona jo të privilegjuar derisa Paneli të ketë vendosur mbi bazueshmërinë e aplikimit të ZPS-së. Çdo kërkesë për komunikim me një person jo të privilegjuar do t’i nënshtrohet autorizimit paraprak nga regjistruesi. Çdo komunikim i tillë, kur autorizohet nga Sekretari, do të monitorohet në mënyrë aktive dhe Paneli autorizon Zyrën e Regjistrimit të ndalojë çdo komunikim të tillë në çdo moment kur ekzistojnë arsye për të justifikuar një masë të tillë”, thuhet nga Specialja.
Ky vendim, vjen pas parashtrimeve të Zyrës së Prokurorit të Specializuar, se në këto takime po shpërndahen informacione konfidenciale.
“Informacioni i vendosur para Panelit sugjeron se ekziston një rrezik real që informacioni konfidencial t’u zbulohet individëve që nuk kanë të drejtë t’i marrin ato. Zbulimi i paligjshëm i një informacioni të tillë mund të ndikojë negativisht në mbrojtjen efektive të viktimave dhe dëshmitarëve dhe integritetin e procedurave”
Ndaj kësaj ka reaguar kryeministri i Kosovës, Albin Kurti.
Ai këtë e cilësoi si zhvillim negative, derisa tha se me gjithë mundësitë e kufizuara do të bëjnë diçka si institucione.
Kjo masë është e përkohshme nga Gjykata Speciale, e cila është duke pritur edhe reagim nga ana e mbrojtësve të Thaçit, Veselit e Selimit.
