Shtetet e Bashkuara të Amerikës dhe Gjermani do të dërgojnë së shpejti trupa shtesë në Kosovë. Njohësit e sigurisë vlerësojnë se shtrimi i këtyre trupave tregon për brishtësinë e sigurisë në veri të vendit. Derisa vlerësohet se shteti nuk duhet të ndërmarrë veprime të pakoordinuara.
Pas sulmit të 24 shtatorit në Banjskë të Zveçanit, vendet anëtare të NATO-s kanë rritur prezencën me trupat ushtarake në veri.
E shumë shpejt, 100 ushtarë nga Garda kombëtare e Idaho-s pritet të vendosen në Kosovë.
Kjo u bë e ditur përmes një njoftimi nga Ushtria amerikane.
“Operacioni Joint Guardian është një mision i përbashkët nën Komandën Evropiane të Shteteve të Bashkuara. Ushtarët do të fokusohen në trajnimin dhe mbështetjen e partnerëve aleatë. Ushtarët e Task Force Sawtooth kanë punuar dhe trajnuar me zell gjatë 18 muajve të fundit për këtë dislokim” thuhet në njoftim.
Ndërsa edhe Bundeswehri gjerman ka bërë të ditur se 200 ushtarakë do të zbarkojnë në Kosovë.
“Për vite me radhë, pjesëmarrja gjermane në operacionin e Forcave të Kosovës KFOR u karakterizua nga tkurrja e kontingjenteve. Megjithatë, meqë shpërthimet në rritje të dhunës kanë kërcënuar stabilitetin e rajonit që nga viti 2022, Bundeswehr-i po dërgon një kompani operative prej rreth 200 burrash dhe grash në Forcën e KFOR-it të Kosovës në vitin 2024. Me patrullat e saj ajo siguron pak më shumë siguri”, thuhet ne njoftim.
E krejt këto vendime po i sheh të duhura njohësi i sigurisë, Nuredin Ibishi.
Teksa vlerëson se shteti nuk duhet të ndërmarrë veprime të pakoordinuara.
“Situata është e brishtë përkundër asaj se duket e qetë dhe stabile për momentin, por çdoherë me tendencë të një brishtësie të lartë. Edhe të gjitha këto vizita që i ka bërë edhe shefi i CIA-s, tregon momentin që duhet të jemi shumë të kujdesshëm që të mos marrim aksione apo veprime të pakoordinuara”, deklaroi Ibishi për Tëvë1.
Derisa tha se pjesëtarë të grupit të Milan Radoiçiq që janë të lirë në Beograd, përbëjnë rrezik për Kosovën.
“Ai planifikon në bashkëpunim me Radojiçiqin dhe ekstremist të tjerë në ambiente edhe poligone ushtarake edhe të ambienteve private, Kapaonik, Rashkë dhe rreth kufirit të Kosovës, ka grupe paramilitare që ai mendon t’i inflirtojë në sistemin e 24 shtatorit”, tha Ibishi.
Kontingjenti i ri do të kontribuojë në aktivitete të përditshme drejtë sigurisë për të mirën e të gjitha komuniteteve që jetojnë në Kosovë.
