Në qershor të këtij viti, iu vu gurthemeli.
Ministria e Shëndetësisë bashkë me komunën e Shtimes, nisën punimet në objektin e ri të Institutit Special, institucion ky i cili është i vetmi në Kosovë që ofron kujdes të specializuar 24-orësh për fëmijët, të rinjtë dhe të rriturit me aftësi të kufizuara intelektuale dhe nevoja për mbështetje në zhvillim.
Projekti që llogaritet të jetë investim gati 6 milionë euro, po kundërshtohet zëshëm nga shoqëria civile e profesionistë të fushës që nga qershori i këtij viti, kur edhe u shpalos kjo iniciativë.
Në këtë vazhdë, Kolektivi për Mendim dhe Veprim Feminist, shkroi edhe disa grafite në ndërtesën e Ministrisë së Shëndetësisë.
“Me mandatimin e shtetit, vazhdon mbajtja peng e pacientëve/eve në Institutin Special. Këtyre qytetarëve/eve, të cilët/at kanë nevojë për ndihmë, ju është ndërtuar një burg që vuajtja e tyre të tëhuajsohet, e të largohet nga vëmendja jonë kolektive. Në vazhdën e tentimeve për zhdukjen e këtyre pacientëve/eve, ky objekt që ofendon çdo ndjesi njerëzore për komunitet, do të zhvendoset sa më larg vëmendjes tonë që është e mundur”.
Karshi këtyre kundërshtive, Ministria e Shëndetësisë e cila është sponsorizuese e këtij projekti bashkë me komunën e Shtimes, po heshtin.
Bind Skeja nga Qendra për Informim dhe Përmirësim social, argumonton pse kjo lëvizje e objektit të Entit Special është e papranueshme.
“Qekjo lëvizja në Zborcë, është një mënyrë që me shty edhe më shumë në periferi. Kjo nuk zgjidh ndonjë problem, kjo veç i merr qata njerëz dhe i lë me jetu në vuajtje më gjatë, në një vend tjetër domethënë që ne jemi më pak të ekspozuar ndaj tyre. Kjo natyrisht që është e papranueshme për ne. Edhe ata janë qytetarë të Kosovës, edhe ata kanë të drejtë në jetë dhe kanë të drejtë të jetës në komunitet”, deklaroi Skeja.
Fokusi i Ministrisë së Shëndetësisë sipas tij, duhet të jetë në shtrirjen e këtij institucioni në shërbime komunitare.
“M’i marrë krejt qeto shërbime që janë të qendrizuara edhe m’i shtri në komunitet. M’i marrë krejt qeto institucione që janë të mbyllura edhe m’i hapë. Kështu, Institutin Special e bën një plan për me mbyllë dhe paralelisht ia nisë me hap shërbime komunitare, qendra të shëndetit mendor, shtëpi për integrim në bashkësi, shtëpi të specializuara për persona më aftësi të kufizuara intelektuale, qysh edhe janë shtatë shtëpi të tilla. Pra, krejt çfarë duhet të bëhet, është që këtë sistem komunitar, me fuqizu”.
Objekti i ri i Institutit Special thuhet se do të sigurojë kushte më të mira për akomodim, trajtim, rehabilitim dhe përkujdesje për çdo rezident të institutit.
Fillimin e punimeve të saj e kanë kundërshtuar edhe banorët e fshatit Zborc, të cilat kanë dorëzuar edhe një peticion me mbi 200 nënshkrime për ta kundërshtuar lokacionin e këtij projekti.
