Institucionet e sigurisë së Kosovës janë alarmuar sërish.
Vetëm gjatë së shtunës dhe të dielës u arrestuan 16 shtetas serbë ku katër prej tyre rezultuan të jenë oficerë aktivë të sigurisë së Serbisë.
Sipas autoriteteve të sigurisë Serbia po synon që ta destabilizojë Kosovën andaj kanë kërkuar vigjilencë të institucioneve.
Ministri i Brendshëm në detyrë, Xhelal Sveçla, ka thënë se ka prova që dëshmojnë ndërlidhjen e tyre me “strukturat e inteligjencës ushtarake serbe dhe me anëtarë të grupit terrorist që kreu sulmin në Banjskë”.
Njohësi i çështjeve të sigurisë, Nuredin Ibishi, tregon se cilat ishin qëllimet e serbëve të arrestuar në Kosovë.
“Këto grupe i shfrytëzojnë këto mënyra për tu paraqitur si pelegrinë me qëllim që të infiltrohen dhe të grumbullojnë informacione për propagandë. Tani kjo çështje i takon institucioneve të sigurisë dhe prokurorisë që ta hetojnë rastin”, tha Ibishi.
Edhe më herët shteti serb ka synuar që ta destabilizojë Kosovën me metoda të ngjashme ku persona të caktuar shfaqen kinse si pelegrinë.
“Ne që nga viti 2000 duke qenë aktiv në terren kemi parë këso rastesh dhe i kemi lajmëruar institucionet atëhershme që ishin të UNMIK-ut, por që nuk trajtoheshin me seriozitet. Ne në vitin 2001 në Fushë Kosovë kemi zbuluar armatime në shkolla, podrume, banesa ku i kishin fshehur serbët”, tha ai.
Lidhur me arrestimet ka reaguar edhe presidenti serb, Aleksandër Vuçiqi, i cili është referuar aktit si terror.
