Në zgjedhjet e 9 shkurtit e as ato të 28 dhjetorit nuk morën pjesë.
Por Partia Socialdemokrate ka ndryshuar mendje për zgjedhjet e reja që pritet të mbahen së shpejti.
PSD ka në plan t’i hyjë garës zgjedhore, por paralajmërojnë se kauza e tyre, kësaj radhe është më ndryshe.
Nga kjo parti, fushatën e kanë nisur kundër partive që deri më tani ishin në opozitë.
“Opozita aktuale që e kemi është opozitë e interesave, interesave grupore, ajo nuk ka ide dhe besime politike. Ata janë të gatshëm më i shku Kurtit në takime kur mendojnë që munden me ngjye pushtetin e tij sado pak dhe në momentin që e shohin se nuk po marrin pushtet për veti, ata mundohen me u tërheq edhe fillojnë me luajt rolin që me demek ne po e shpëtojmë Kosovën”, ka thënë Frëshër Krasniqi nga PDS.
Anëtari i kryesisë së PSD-së tregoi arsyet se pse po dëshirojnë që fushata e tyre te jetë kundrejt opozitës dhe jo ndaj Vetëvendosjes.
“Besoj që është dilema se a kemi opozitë në parlament, se me këtë opozitë ti nuk po mundesh me sulmu Kurtin, sepse ata po ndërtojnë iluzione që gjoja Vjosa Osmanin po mujka me dëmtu Kurtin, një person që u largu nga Kurti vetëm kur Kurti i tha nuk po mundem me të bo presidente”, ka thënë Krasniqi.
Krasniqi gjithashtu tregoi se sa i shohin gjasat për hyrje në Kuvend të Kosovës.
“Pa dyshime që PSD hyn e vetme në këto zgjedhje e se a do ta kalojmë pragun dhe a do të kemi sukses elektoral këtë nuk e përcaktojmë ne por e përcaktojnë qytetarët e Republikës së Kosovës”, është shprehur ai.
Në rast që PSD arrin të sigurojë ulëse brenda parlamentit, sipas anëtarit të kësaj partie, asnjëherë nuk do të bashkëpunojnë me Vetëvendosjen.
“Ne nuk kemi më bashkëpunu kurrë në jetën tonë, edhe nëse kurrë bre nuk kemi me mujt me hy as në Qeveri e as në Kuvend, nuk kemi më bashkëpuna me pushtetin autoritar. Pushteti autoritar luftohet, pushtetin autoritar kërkund në botë nuk e kanë rrëzuar duke bashkëpunuar më të”, ka thënë Krasniqi.
Në zgjedhjet e përgjithshme të 2019, PSD kishte bërë koalicion me Aleancën për Ardhmërinë e Kosovës, por nuk kishte arritur ta sigurojë asnjë ulëse.
