Kolektivi për Mendim dhe Veprim Feminist do të protestoj të premten para Gjykatës Themelore në Ferizaj për të kërkuar dënim maksimal për të dyshuarit për vrasjen e Marigona Osmanit: Dardan Krivaqa dhe Arbër Sejdiu, raporton teve1.info
Përmes një njoftimi në Facebook, kjo organizatë ka thënë se protesta me mbishkrimin “Ne nuk harrojmë” do të mbahet me fillim nga ora 10:30 para Gjykatës, derisa nisja nga Prishtina bëhet me organizim nga rrethi i flamurit me fillim në orën 9:30.
“Këtë të premte mbahet seanca përfundimtare ndaj Dardan Krivaqës dhe Arbër Sejdiut, të akuzuar për vrasjen e Marigona Osmanit. Për t’u siguruar që kërkesa jonë për drejtësi të jehojë edhe të premtën para Gjykatës Themelore në Ferizaj, ne mblidhemi nga ora 10:30 para dyerve të Gjykatës për të kërkuar drejtësi për Marigonën dhe ndëshkim maksimal për vrasësit.
Dhuna mizore të cilën e ushtroi Krivaqa me ndihmën e Sejdiut ndaj Marigonës deri kur e vrau dhe humbja e saj na e bën të pamundur të harrojmë. Ne nuk mund të harrojmë që Marigona do të mund të ishte gjallë sot nëse shteti do ta mbronte me kohë atë. Të indinjuar/a e me shumë dhimbje, ne mblidhemi këtë të premte dhe thërrasim në drejtësi për Marigonën”, thuhet ndër të tjera në njoftimin në Facebook.
Procesi gjyqësor ndaj Dardan Krivaqës dhe Arbër Sejdiut di të dyshuarit kryesor në vrasje dhe dhunimin e Marigona Osmanit një vit më parë ka filluar vitin e kaluar, ndërsa të premten gjykata pritet të shpall aktgjykimin për këtë rast.
