Qëndruan për disa orë para Rektoratit të Universitetit të Prishtinës.
Aktivistët e Lëvizjes Feministe Studentore nga fillimi i këtij muaji po kërkojnë përjashtimin e profesorit Xhevat Krasniqi.
Ata bllokuan dyert e rektoratit dhe thanë se nuk do të largohen deri në shkarkimin e profesorit.
“Ne e kemi bllokuar derën e rektoratit dhe nuk kemi me i lënë anëtarët e Këshillit të Etikës pa u marrë vendimi për shkarkimin profesorit Krasniqi nga UP. Ata tani e një orë janë brenda tu e mbajtë mbledhjen ku është supozu me marrë vendimin por ata dolën dhe na thanë se nuk ka vendim dhe janë duke i shqyrtuar dhe njëherë provat. Për neve kjo është e papranueshme. Ne edhe njëherë i bëjmë thirrje që dera e rektoratit nuk do të lëshohet pa u marrë vendimi meritor për Krasniqin, gjithashtu ne kemi bërë thirrje për bojkot të ligjëratave të të gjitha fakulteteve të Prishtinës”, tha Anita Mjeku nga Lëvizja Feministe Studentore.
Mos shkarkimi i profesorit, do të bëjë që studentët të mos ndalen deri sa të merret vendimi.
Për këtë foli edhe një studente e cila i është bashkangjitur kësaj proteste.
“Kjo nuk mund të pranohet për shkak se na duhet me u shkollu dhe me u eduku në një ambient të sigurtë, kështu po vërehet prej 27 denoncimeve që nuk i kanë mjaftu Këshillit të Etikës për me përjashtua Xhevat Krasniqin por është dashtë me i bë presion shoqëria civile dhe organizatat e tjera për me u marrë seriozisht kjo çështje”, tha studentja Erza Dubova.
Pas disa orësh, në këtë protestë ka ndërhyrë Policia e Kosovës.
Disa aktivistë janë tërhequr zvarrë për të zhbllokuar kështu hyrjen e Rektoratit.
Si pasojë e rezistencës, është shoqëruar në stacionin policor, aktivisti Rron Gjinovci.
I njëjti është mbajtur për disa minuta dhe pastaj është liruar dhe i është bashkuar përsëri protestuesve, të cilët janë mbledhur para stacionit policor në Prishtinë.
