Të paktën 13 persona kanë humbur jetën dhe dhjetëra të tjerë janë plagosur në Nepal, pasi demonstratat masive kundër vendimit të qeverisë për të bllokuar platformat kryesore të rrjeteve sociale u përshkallëzuan në përplasje të dhunshme me policinë.
Mijëra qytetarë, kryesisht të rinj që u vetëquajtën “Gjenerata Z”, u mblodhën pranë parlamentit në Katmandu për të kundërshtuar ndalimin e Facebook, X, YouTube e platformave të tjera.
Ata mbanin pankarta me mbishkrime si “Mjaft më” dhe “Fund korrupsionit”, duke akuzuar qeverinë për qëndrim autoritar.
Policia u kundërpërgjigj me gaz lotsjellës, topa uji, shkopinj gome dhe plumba plastikë, pasi një pjesë e protestuesve tentuan të hynin në zonën e ndaluar rreth parlamentit. “Forca u përdor pasi demonstruesit thyen rregullat dhe depërtuan në hapësirat e kufizuara”, tha për AFP zëdhënësi i policisë, Shekhar Shekhar Khanal.
Vendimi për bllokimin e rrjeteve sociale u mor javën e kaluar, pasi 26 platforma nuk respektuan afatin për t’u regjistruar në Ministrinë e Komunikimit dhe Teknologjisë së Informacionit të Nepalit. Deri më tani, vetëm dy prej tyre janë riaktivizuar pasi plotësuan kriteret ligjore.
Autoritetet justifikuan masën duke thënë se synojnë “rregullimin” e platformave për të luftuar lajmet e rreme, gjuhën e urrejtjes dhe mashtrimet online. Por përdoruesit, të cilët i shfrytëzojnë për argëtim, informim dhe biznes, e kanë parë këtë si një kufizim të drejtpërdrejtë të lirisë së tyre.
Që prej së premtes, qasja në shumicën e rrjeteve sociale është bllokuar, megjithatë shumë qytetarë po përdorin VPN për të anashkaluar ndalimin.
