Prokuroria Themelore në Prishtinë ka bërë të ditur se dy zyrtarët e Ministrisë së Punëve të Brendshme dhe një shtetas i huaj të arrestuar në aksionin e përbashkët të Policisë së Kosovës dhe Agjencisë Kosovare për Inteligjencë, janë ndaluar për 48 –orë.
Sipas Prokurorisë dy nga të arrestuarit, njëri prej tyre zyrtar në Divizionin për të Huaj, ndërsa tjetri është zyrtar në Agjencinë e Regjistrimit Civil (ARC) ka dyshohen se kanë kryer veprën penale ‘’Keqpërdorimi i detyrës apo autoritetit zyrtar’’.
Sipas Prokurorisë, F.SH dhe G.J kanë lëshuar leje qëndrimi për shtetas të huaj duke përfituar dobi pasurore.
“Nga hetimet e deritanishme rezulton se të dyshuarit F. Sh., dhe G.J., në cilësinë e personave zyrtarë dyshohen, se në bashkëkryerje kanë lëshuar leje qëndrimi për shtetas të huaj, duke u mundësuar atyre pajisjen me dokumentacionin përkatës, përmes të cilit dyshohet se kanë përfituar dobi pasurore në mënyrë të kundërligjshme. Ndërkaq, i dyshuari me inicialet D.K., dyshohet se ka falsifikuar dokumente të ndryshme me qëllim që t’iu mundësojë personave të tjerë të aplikojnë dhe të pajisen në mënyrë të kundërligjshme me leje qëndrimi në Republikën e Kosovës”, thuhet në komunikatën e Prokurorisë.
Prokurori i Shtetit, brenda afatit ligjor, do të shqyrtojë mundësinë për paraqitjen e kërkesës për caktimin e ndonjërën prej masave të sigurisë ndaj të dyshuarve, në përputhje me dispozitat e Kodit të Procedurës Penale, bëhet e ditur në komunikatë.
