Prokuroria Speciale e Kosovës, në bashkëpunim me Policinë e Kosovës, ka arrestuar pesë persona në kuadër të hetimeve për rastin e njohur si “Reçaku II”.
Detaje rreth operacionit ka dhënë prokurori special Ilir Morina gjatë një konference për media, ku bëri të ditur se të dyshuarit janë identifikuar përmes provave të siguruara gjatë hetimeve, përfshirë edhe video-incizime.
Morina theksoi se hetimet për Masakrën e Reçakut kanë vazhduar edhe pas ngritjes së aktakuzës në dhjetor të vitit të kaluar dhe se gjatë muajve të fundit janë mbledhur dëshmi shtesë që kanë ndihmuar në identifikimin e personave të dyshuar.
“Prokuroria ka ngritur aktakuzë për rastin e Masakrës së Reçakut në dhjetor të vitit të kaluar, por hetimet nuk kanë përfunduar. Gjatë kësaj periudhe kemi vazhduar mbledhjen e provave dhe kemi arritur të identifikojmë disa persona që kanë qenë pjesë e njësive policore serbe dhe që dyshohet se kanë marrë pjesë në aksionin e 15 janarit 1999 në fshatin Reçak”, deklaroi Morina.
Sipas tij, pas sigurimit të provave të mjaftueshme, Prokuroria ka kërkuar nga gjykata urdhër-arreste dhe urdhër-kontrolle, kërkesa të cilat janë miratuar.
“Pas aprovimit nga gjykata, sot është realizuar operacioni, gjatë të cilit janë arrestuar pesë persona që dyshohet se kanë qenë të përfshirë në ngjarjet e Masakrës së Reçakut”, tha prokurori special.
Prokurori, ndau edhe dy nga fotot e personave të dyshuar, duke treguar se janë identifikuar përmes dy video-incizimeve.
