Prokuroria Speciale ka ngritur aktakuzë ndaj tre të pandehurve, P.T., A.G. dhe M.A., për veprat penale “Fajdeja” dhe “Mbajtja në pronësi, kontroll ose posedim të paautorizuar të armëve”.
Sipas Prokurorisë, P.T. dhe A.G. akuzohen se gjatë viteve 2022-2023, me qëllim të përfitimit të kundërligjshëm pasuror, kanë detyruar viktimën B.P. të ndërmarrë veprime në dëm të pasurisë së tij.
Në aktakuzë thuhet se P.T. kishte autorizuar viktimën për shitjen e një lokali në pronësi të tij, duke e mashtruar se i ishte bllokuar llogaria bankare. Viktima kishte lidhur kontratë për shitjen e lokalit me A.G., në vlerë prej 150 mijë eurosh.
“A.G., me arsyetimin se nuk është realizuar kontrata, përmes kanosjes ka detyruar viktimën të paguajë shuma të mëdha parash,” thuhet në aktakuzë.
Ndërkohë, M.A. akuzohet se e kishte detyruar viktimën B.P. të paguajë tri herë më shumë sesa shumën e borxhit, që viktima ishte detyruar ta marrë për shkak të gjendjes së tij financiare të rënduar.
Procesi gjyqësor ndaj të pandehurve pritet të zhvillohet në ditët në vijim.
