Prokurori i Shtetit ka njoftuar se deri në këto momente ka ndaluar pesë persona për vepra penale kundër të drejtave të votimit, ndërsa 12 të tjerë janë liruar në procedurë të rregullt.
Sipas njoftimit, gjatë ditës së sotme janë pranuar disa informata, të cilat pas verifikimit dhe trajtimit kanë rezultuar se 17 prej tyre përmbajnë elemente të veprave penale kundër të drejtave të votimit.
Rastet e raportuara janë 4 në rajonin e Prishtinës, 6 në rajonin e Prizrenit, 2 në rajonin e Pejës, 3 në të Ferizajt dhe dy raste në veri të Mitrovicës.
Prokuroria ka bërë të ditur se mbi 100 prokurorë dhe pjesëtarë të sistemit prokurorial kanë qenë të angazhuar gjatë procesit zgjedhor për të siguruar mbarëvajtjen e tij.
Gjithashtu, bëhet e ditur se prokurorët do të vazhdojnë të jenë të angazhuar edhe gjatë procesit të numërimit të votave, deri në dërgimin e materialeve zgjedhore në qendrat komunale të numërimit.
“Me këtë rast Zyra e Kryeprokurorit të Shtetit falënderon qytetarët e Republikës së Kosovës, mediat dhe shoqërinë civile për bashkëpunimin e treguar me Prokurorin e Shtetit, me qëllim parandalimin dhe ndjekjen e suksesshme të veprave penale lidhur me këto zgjedhje”, theksohet në fund të njoftimit.
