Prokuroria Themelore në Prishtinë ka njoftuar se gjatë aksionit të së mërkurës në Agjencinë Kadastrale të Kosovës dhe Agjencinë e Arkivave të Kosovës, pesë persona janë shoqëruar në Polici, ndërsa pas intervistimit, disa prej tyre janë arrestuar, mbi dyshimin për përfshirje në veprimtari të kundërligjshme.
Sipas Prokurorisë, hetimet lidhen me rastin e bartjes së paligjshme të pronës publike në pronësi private përmes një aktgjykimi të falsifikuar.
“Prona në fjalë gjendet në Veternik të Prishtinës, dhe është pronësi publike e Agjencisë Kosovare të Privatizimit (AKP) përkatësisht të ndërmarrjes shoqërore RTP. Prokuroria Themelore në Prishtinë mbetet e përkushtuar në hetimin dhe ndjekjen e veprave penale që dëmtojnë interesin publik dhe pasurinë publike”, thuhet në njoftim.
Në njoftim po ashtu është bërë e ditur se ky aksion është kryer në bashkëpunim të ngushtë me Drejtorinë për Hetimin e Krimeve Ekonomike dhe Korrupsionit të Policisë së Kosovës.
