Prokuroria Speciale, ka bastisur banesën e Shkëlzen Gashit me arsyetimin se ka kryer veprën “Nxitja e përçarjes dhe mosdurimit”.
Bastisja është bërë të hënën, ardhur pas ekspozitës “Masakrat në Kosovë 1998-1999” e cila pasqyroi informata të pasakta mbi masakrat në Kosovë dhe e cila ishte e bazuar në librin e Shkëlzen Gashit.
“Sipas provave materiale dhe raportimeve të publikuara në media nga ana e të dëmtuarve në masakrën e Dubravës, dhe masakrat tjera të ndodhura në Kosovë, e po ashtu edhe nga raportimet e qytetarëve, të cilët kanë qenë të dëmtuar dhe viktima të këtyre masakrave, Prokuroria Speciale ka hapur rast penal ndaj të dyshuarit Shkëlzen Gashi, i cili me veprimet e tij publike dyshohet se ka shkaktuar përçarje dhe mos durim me qytetarët tanë dhe duke dëmtuar dhe ndryshuar të vërtetën e luftës çlirimtare në Kosovë, e që konsiderohet se me këto veprime i dyshuari ka përmbushur elementet e veprën penale “Nxitja e përçarjes dhe mos durimit” nga neni 141 të KPK-së”, thuhet në autorizimin e Prokurorit të Shtetit, të cilën e ka publikuar aktivisti Rron Gjinovci.
Gashi kishte kërkuar falje për ekspozitën me të dhëna të pasakta të cilave tha se ju referua organizatës së Natasha Kandiq. Por, kjo akuzoi Gashin se nuk ka “ditur të lexojë të dhënat”.
