Shqipëria dhe Kosova ëndërrojnë pjesëmarrjen në Botëror. Për këtë, secili prej tyre duhet të luajë fillimisht gjysmëfinalen. Kombëtarja sfidon nesër Poloninë, ndërsa përfaqësuesja e Kosovës mat forcat me Sllovakinë. Sfida që luhen në transfertë dhe nisin prej orës 20:45.
Projeksionet i japin më tepër mundësi Kosovës, që të shkojë në Botëror. “Dardanët” kanë 41% mundësi për të shkuar në finale, kundrejt 32% të Shqipërisë. Sa i përket kualifikimit në Botëror, sipas situatës aktuale, Kosova ka 20%. Shqipëria ndërkohë vetëm 11% mundësi, duke qenë në vendin e 12 nga 16 përfaqësueset pjesëmarrëse të “play off”.
Është një rast i rrallë me projeksionet. Kjo pasi “Football Meets Data” nuk i jep asnjërës nga përfaqësueset e “play off”, të paktën 50% mundësi për kualifikimin në Botëror. Shkak për këtë bëhen dy ndeshjet që duhet të luhen. Nëse Shqipëria kalon nesër Poloninë, e pret fituesi i Ukrainë-Suedi. Kosova ndërkohë do të sfidonte ekipin që kalon nga çifti Turqi-Rumani.
