Proton Cable Prizreni i ka dhënë fund serisë prej pesë humbjeve rresht në Superligën e Kosovës në basketboll.
Të dielën, në palestrën “Sezai Surroi”, Proton Cable Prizreni ka mposhtur Borën e Prishtinës me shifrat 101:82, në kuadër të xhiros së 20-të.
Kjo përballje ishte ndërmjet skuadrave që po luftojnë të largohen nga pozita e fundit në tabelë, e cila dërgon në një kategori më poshtë të garave sezonin tjetër.
Përkundër fitores, Proton Cable Prizreni ka mbetur i fundit në tabelë me 25 pikë, një më pak se Bora që renditet e parafundit.
Proton Cable Prizreni ishte ekip më i mirë dhe këtë e tregoi në çerekun e parë, të cilin e mbylli me shifrat 30:16.
Kjo epërsi e krijuar në periudhën e parë, ishte vendimtare për fitoren e Proton Cable Prizrenit ndaj rivalit direkt në luftën për mbijetesë.
Qendra Tervell Beck ishte i pandalshëm te Proton Cable Prizreni pasi ndeshjen e përfundoi me 30 pikë, 12 kërcime e 5 asistime kurse te Bora u dallua Jetmir Zeqiri me 17 pikë, 9 kërcime e 5 asistime.
