Skuadra e Sigal Prishtinës në edicionin 2023/24 do të paraqitet në Ligën Ballkanike. Pjesëmarrjen e Prishtinës në këtë garë e ka konfirmuar edhe faqja zyrtare e kësaj lige.
Prishtina rikthehet në këtë garë pas dy sezonesh dhe deri më tani, janë konfirmuar vetëm katër skuadra për edicionin e ri.
Data e nisjes dhe detajet tjera ende nuk janë bërë publike nga BIBL.
Prishtina do të paraqitet në këtë garë pasi më herët u përjashtua nga ENBL League për shkak se nuk kishte kryer obligimet e sezonit të kaluar.
Para Prishtinës, pjesëmarrjen në BIBL, e kanë konfirmuar edhe dy skuadra nga Mali i Zi, Lovqeni e Cetinje, si dhe ekipi nga Qipro, AEL Limassol.
Ky do të jetë edicioni i 16-të i BIBL-it, garë të cilën Prishtina e ka fituar dy herë rresht (2015, 2016). Vitet e fundit, kjo ligë e ka humbur kredibilitetin e saj për shkak të numrit të vogël të skuadrave pjesëmarrëse. Krahas Prishtinës, në këtë garë janë paraqitur edhe Peja, Bashkimi e Rahoveci.