Çdo Komunë në Kosovë duhet të ketë të hartuar planin për fatkeqësitë natyrore.
E pothuajse në përfundim të këtij plani është Komuna e Prishtinës.
Nga kjo komunë thonë se do të identifikohen të gjitha kapacitetet që ka kryeqyteti në rast të ndonjë fatkeqësie.
“Plani parasheh identifikimet e të gjithave rreziqeve që i kanosen kryeqytetit duke filluar nga fatkeqësitë natyrore apo fatkeqësitë e shkaktuara nga dora e njeriut dhe të gjitha ato aspektet që hynë në domenin e rrezikut që mund ti ketë kryeqyteti. Po ashtu do të identifikohen edhe kapacitetet që ka kryeqyteti në të gjitha fushat duke filluar nga shëndetësia, mirëqenia sociale, objektet e infrastrukturës kritike dhe kapacitetet që i ka kryeqyteti në rast të fatkeqësive”, ka thënë drejtori i Emergjencave në Komunën e Prishtinës, Lulzim Fushtica.
Ky plan po vlerësohet që duhej të përfundonte më herët.
Pritjet janë të mos mbesë vetëm në letër por edhe të gjejë zbatim.
“Fatkeqësitë natyrore janë të pa parashikuara ato mund të ndodhin dhe nuk mund ti ndalojmë por institucionet qoftë ato qendrore dhe ato komunale, duhet që gjithmonë të jenë të përgatitura në mënyrë që të reagojnë në mënyrë profesionale, coftë me burime njerëzore apo teknike dhe duhet të përmendim që Prishtina qëndron më mirë se komunat tjera sa i përket reagimit nga ana e zjarrfikësve që janë të parët, mirëpo duhet të punohet që të shtohet numri i zjarrfikësve apo të investohet ne pajisje që lënë për të dëshiruar”, ka thënë njohësi i cështjeve emergjente, Tahir Ahmeti.
Si pasojë e erërave, para disa muajsh ka rënë çatia e objektit të ri të Komunës së Prishtinës në Arbëri, e që kishte mbetur e lënduar një 23 vjeçare.
