Prishtina ka shënuar fitore bindëse me rezultat 4-0 në udhëtim ndaj Suharekës në kuadër të javës së 28-të në elitën e futbollit kosovar.
Të besuarit e Arsim Thaçit kaluan në epërsi në minutën e 39-të duke shënuar për 1-0 me anë të Ardian Limanit i cili realizoi me kokë.
Në pjesën e dytë mysafirët ia dolën të shënojnë edhe tri herë të tjera, për të marrë fitoren e parë në kampionat nën udhëheqjen e trajnerit Arsim Thaçi.
Fillimisht për 2-0 u përkujdes Dion Gallapeni, i cili pas një depërtimi të bukur brenda zonës e mposhti portierin Ozdogan në minutën e 52-të.
Prishtina nuk u ndal më kaq dhe realizoi sërish, ku edhe këtë herë në skenë ishte Limani i cili shënoi me kokë për 3-0.
Goditjen finale Suhareka e mori në minutën e 82-të kur kryeqytetasit realizuan për rezultatin përfundimtar 4-0.
Menjëherë pas golit të katërt, mysafirët mbetën me një lojtar më pak në fushë pasi Ardian Limani u ndëshkua për ndeshjen e dytë radhazi me karton të kuq pas atij ndaj Dritës në Kupën e Kosovës.
Me këtë fitore Prishtina shkon në kuotën e 38 pikëve dhe mban pozitën e katërt në tabelë, teksa Suhareka renditet e teta me 32 sosh.
