Skuadra e Prishtinës ka shpëtuar sezonin e dobët në Superligë, pasi fitoi Kupën e Kosovës në futboll për këtë sezon.
Në finalen e luajtur të enjten mbrëma në stadiumin “Fadil Vokrri” në kryeqytet, Prishtina mposhti 1:0 Llapin.
Golin e vetëm, që doli të jetë edhe i fitores, e shënoi mesfushori Albin Krasniqi, i cili realizoi në minutën e 59-të.
Ne këtë sukses, Prishtina ka siguruar pjesëmarrjen në kualifikimet e garave të UEFA-s, ku rikthehet pas tri vjetësh.
Po ashtu, për Prishtinën ky është suksesi i tetë në Kupën e Kosovës, ndërsa Llapi ka fituar dy herë dhe i ka humbur dy finale.
Ndeshja e luajtur bë kryeqytet ishte interesante dhe atmosferë të mirë në tribuna, por Prishtina pati më shumë raste se Llapi.
Në fakt, ishte portieri i Llapit, Marjan Çoriq që disa herë intervenoi për të shpëtuar portën e tij.
Llapi ndeshjen e mbylli me një lojtar më pak, pasi Arbnor Ramadani u përjashtua në minutën e 58-të pas dy kartonëve të verdhë.
Pasi nuk e fitoi Kupën e Kosovës, Llapit i mbetet të siguroj mbijetesën në Superligë.
Aktualisht, është i teti në tabelë, pozitë që siguron barazhin dhe për ta mbajtur atë, patjetër i duhet fitorja këtë vikend në xhiron e fundit.
Prishtina është në pozitën e shtatë dhe falë triumfit në Kupë do të luaj në garat evropiane.
