Sigal Prishtina është finalistja e dytë e Kupës së Kosovës në basketboll. Prishtina e fitoi ndeshjen dramatike ndaj Golden Eagle Yllit me rezultatin 80:76.
Ndeshja në Rahovec është vendosur në aksionet e fundit. Në fakt Prishtina ka udhëhequr prej fillimit, kurse Ylli në epërsi për herë të parë ishte 64 sekonda para fundit. Wesley Washpun realizoi për tri pikë për rezultatin 74:73.
Por Prishtina ktheu epërsinë në 75:74 me shënimin e Derrick Wilson. Jan Palokaj shënoi dy gjuajtje të lira për 77:74, derisa Washpun shënoi për 77:75.
Për 78:75 realizoi Palokaj, ndërsa vetëm një gjuajtje të lirë realizoi edhe Malcolm Armstead, nëntë sekonda para fundit. Dardan Berisha realizoi dy gjuajtje të lira në fund për 80:76.
Finalja me Trepçën luhet të dielën në Rahovec.
Berisha ndeshjen e mbylli me 20 pikë, gjashtë kërcime e tri asistime. Dustin Thomas i kishte 22 pikë, ndërsa Derrick Wilson i kishte 16 pikë e katër kërcime. Kontribut të madh dha edhe Nate Grimes me shtatë pikë e 12 kërcime.
Tek Ylli më i miri ishte kapiteni Gëzim Morina me 19 pikë e tetë kërcime. Wesley Washpun i kishte 16 pikë, ndërsa Rashun Davis realizoi 11 pikë e shtatë asistime.
