Suhareka – Ballkani dhe Prishtina – Drita, janë çiftet e fazës gjysmëfinale të Kupës së Kosovës në futboll.
Shorti për gjysmëfinale është tërhequr të premten në selinë e Federatës së Futbollit të Kosovës, ndërsa ndeshjet do të jenë tejet interesante. Prej katër skuadrave pjesëmarrëse në këtë fazë, vetëm njëra nuk bën gara në Superligë.
Është skuadra e Suharekës, e cila është pjesë e Grupit A në Ligën e Parë dhe po synon promovimin në elitë edicionin tjetër.
Suhareka do të përballet me kampionin e Kosovës, Ballkanin dhe rivalin lokal. Ndërkohë, dueli tjetër është ai ndërmjet rivalëve të vjetër, Prishtinës dhe Dritës.
Skuadrat finaliste do të përcaktohen pas dy ndeshjeve pasi faza gjysmëfinale e Kupës së Kosovës, zhvillohet me sistem vajtje – ardhje. Ndeshjet e para gjysmëfinale do të luhen muajin e ardhshëm, më 3 prill kurse ato të kthimit pas dy javësh, më 17 prill.
Prishtina është fituese në fuqi e Kupës së Kosovës.
