Shkolla “Elena Gjika” në një dokument në të cilin është përfshirë marrëveshja e shkollës me prindërit ka vendosur ta përdorë termin Prindi 1 dhe Prindi 2 në vend të termave nënë dhe baba. E kjo ka shkaktuar debat të gjerë në opinionin publik duke u konsideruar si shkelje e identitetit të fëmijëve. Por pas reagimeve, shkolla ka dalë me një sqarim.
Prind 1 dhe Prindi 2, është kjo forma që shkolla “Elena Gjika” i është referuar nënës dhe babait.
Në dokumentet e përfshira “Marrëveshja e shkollës me prindërit”, ky institucion në këtë formë vendosi të emërtojë prindërit e nxënësve.
E kjo ngjalli reagime të shumta në opinionin publik..
Drejtoresha e shkollës nuk ka pranuar të jap ndonjë sqarim rreth përdorimit të termave prindi 1 dhe prindi 2 përkundër interesimit të televizionit
E më vonë nga ky institucion dolën me një reagim në Facebook, ku dhanë disa sqarime.
Kjo draft-marrëveshje është hartuar nga grupe punuese të shkollave gjatë vitit 2023 dhe është në harmoni me praktikat evropiane për nënshkrim nga dy prindërit. Është vërejtur se disa prindër e kanë ndërlidhur me procese të tjera, për çka shkolla nuk ka pasur këtë qëllim. Për shkollën është e rëndësishme që dy prindërit të jenë pjesë e shkollimit dhe garantues i bashkëpunimit e ndarjes së përgjegjësisë në të mirë të fëmijëve. Ne ndajmë keqardhje për çdo shqetësim të mundshëm që kjo situatë mund të ketë shkaktuar”, u tha në një postim nga drejtoria e kësaj shkolle.
Edhe nga Drejtoria e Arsimit në komunën e Prishtinës e kanë quajtur një emërtim të tillë si keqkuptim.
“Ka pasur keqkuptime, ku disa prindër e kanë ndërlidhur këtë marrëveshje me procese të tjera, të cilat nuk janë objekt i këtij dokumenti. Për DKA, është thelbësore që të dy prindërit të jenë të angazhuar dhe të kontribuojnë në mënyrë të barabartë në procesin arsimor”.
Termet prind 1 dhe prind i 2 sipas avokatit, Ardian Bajraktari nuk përdoren as në Kushtetutën e Kosovës.
“Legjislacioni në fuqi i Kosovës nuk ka terminologji të tilla, është ligji për familjen dhe ligji për gjendjen civile që kur i referohet të dy prindërve nënkupton prindërit dhe varësisht nga konteksti kur përmend nënës apo babait kjo terminologji përdoret edhe në këto ligj në theks të veçantë në ligjin për familjen, ndërsa varësisht prej konteksti mund të përdoret termi amësi”, tha Bajraktari.
Por sipas sociologut, Genc Xërxa qëllimi i përdorimit të këtyre termave mund të ndërlidhet me faktin se prindërimi është një koncept shumë i gjerë.
“Prindërimi është një koncept shumë i gjerë duke ditur që është ai biologjik edhe prindërimi social, pra varësisht prej shkaqeve dhe rrethanave të ndryshme prindërim mund ta luaj ai fëmija që i ka prindërit e humbur, pra kemi një lloj prindërimi tjetër, pastaj kemi të prindërimet ushquese apo vetë ushqyese. Në një farë forme mendoj që nuk ka të bëjë me kodin civil pasi që ende nuk është miratuar në Kuvendin e Kosovës”, tha Xërxa.
Por për pedagogun, Përparim Blakaj, përdorimi i këtyre termëve është një shkelje e identitetit të fëmijës.
“Ky lloj emërtimi krijon një distancim nga realiteti i natyrshëm i traditës tonë familjare, kjo është një shkelje në identitetin e fëmijës dhe zhvillimin e tij emocional. Unë mendoj që fëmjët kanë nevojë për figura të qarta prindërore dhe simbolikat e përkufizimit nënë dhe baba dhe kujdestarë. Janë shumë të rëndësishme në këtë proces. Këto thjesht nuk janë pozicione simbolike, por janë një strukturë familjare”, tha Blakaj.
Dokumenti i formuar nga grupi punues në shkollën “Elena Gjika” iu është dorëzuar të gjithë prindërve të nxënësve nga klasa e parë deri në klasën e gjashtë.
