Superylli Kylian Mbappe është prezantuar të martën si lojtar i Real Madridit.
Prezantimi i tij në stadiumin “Santiago Bernabeu” ishte përallor pasi ishin mbi 80 mijë shikues të pranishëm në tribuna.
Prezantimin e sulmuesit francez, presidenti i Real Madridit, Florentino Perez e ka quajtur ngjarje historike duke thënë se çdo herë që prezanton një lojtar që do të bartë fanellën e klubit është moment krenarie dhe festë e vërtetë.
Para se të bëhej prezantimi në stadium, Mbappe ka kryer procedurat tjera, ku para firmosje së kontratës i ka kaluar me sukses kontrollimet mjekësore.
Ai me Realin ka firmosur kontratë deri në vitin 2029, ndërsa do ta bartë fanellën me numrin 9.
Gjatë daljes së Mbappes në skenë, publiku madrilen ka shpërthyer në brohoritje, ndërsa 25-vjeçar i është drejtuar me fjalët se ndihet krenar që do të jetë pjesë e klubit mbretëror.
“Kam ëndërruar të luaj për Real Madridin dhe kjo më është bërë realitet. Jam shumë i lumtur për këtë dhe falënderoj presidentin Florentino Perez që ka besuar në mua prej ditës së parë. Jam krenar që jam lojtar i klubit më të mirë në histori të futbollit dhe do të jap gjithçka nga vetja për Real Madridin”, tha Mbappe ndër të tjera.
Mbappe i është bashkuar Realit si lojtar i lirë, pasi javë më parë i ka skaduar kontrata me Paris Saint-Germainin. Me zyrtarizimin e Mbappes, Real Madridi ka nisur një epokë të re “galaktikësh”.
