Rendi dhe siguria në Republikën e Kosovës janë cenuar nga presidentit serb Aleksandër Vuçiq. Ftesa dhe takimi i tij me bartësit e institucioneve të sundimit të ligjit në veri të Kosovës, shihet si një prej formave më eklatante të ndërhyrjes së një shteti fqinjë në vendin tonë.
Ehat Miftaraj nga Instituti i Kosovës për Drejtësi thotë se e tëra kjo është një plan i Vuçiqit për destabilizim të Kosovës, e që sipas tij serbët po e arrijnë fare lehtë këtë gjë.
“Shihet qartazi që presidenti Vuçiq e ka një plan për ta destabilizuar Republikën e Kosovës dhe këtë plan si duket është duke e realizuar me lehtësi, edhe për shkak që institucionet e Republikës së Kosovës siç duket nuk janë të përgatitura për ta pasur një plan të qartë sa i përket kësaj pjesës që ka të bëjë qoftë me dialogun ose qoftë edhe me zgjedhjet e fundit nacionale dhe presidenciale të Serbisë”, tha Miftaraj.
Si të qëllimshëm këtë veprim po e sheh edhe politologu Dritro Arifi, ai thotë se një gjë e tillë në asnjë vend demokratik nuk do të lejohej të ndodhte.
“Ne e kemi thënë gjatë gjithë këtyre viteve që Serbia gjithmonë e kërkon një justifikim që për ta paraqitur Kosovën si një vrimë të zezë. Por, nuk besoj që ka një vend të paktën në Bashkimin Evropian, kur një gjykatëse e një gjykate çfarëdo niveli, shkon te një shtet tjetër te një president i një vendi tjetër. Pra, ajo është shkelje brutale e të gjitha ligjeve dhe rregulloreve që parasheh një gjykatë. Kjo si rrjedhojë logjike na dërgon që absolutisht që tendencat kanë qenë që me e provoku situatën”, tha Arifi.
Në anën tjetër, duke luajtur viktimën, Presidenti serb ka akuzuar kryeministrin e Republikës së Kosovës Albin Kurtin, për shkarkimin e kryetares së gjykatës themelore të Mitrovicës Veriore, duke nxitur edhe protesta të serbëve lokal.
Por, kryeministri Albin Kurti ka rikujtuar edhe njëherë se gjyqësori në Kosovë funksionon si i pavarur nga politika.
“Unë nuk jam as kryetar dhe as anëtar i Këshillit Gjyqësor. Gjyqësori është i pavarur nga Qeveria. Ndoshta në Serbi presidenti pezullon dhe largon gjyqtarët dhe prokurorët. Ky nuk është rasti në Kosovë ose me gjyqtaren Stevanoviç”, ka thënë Kurti.
Raporti i gazetarit Valmir Gallopeni.
