Presidentja e Kosovës, Vjosa Osmani, ka zhvilluar një takim të rëndësishëm me Kryeministren e Islandës, Kristrún Frostadóttir, ku u diskutua mbi bashkëpunimin ndërmjet dy vendeve dhe mbështetja që Islanda i ka dhënë Kosovës në arenën ndërkombëtare.
Gjatë takimit, Osmani shprehu mirënjohjen për përkrahjen e vazhdueshme të Islandës, duke theksuar veçanërisht rolin e këtij shteti në procesin e anëtarësimit të Kosovës në Këshillin e Evropës.
“Jam falënderuese për mbështetjen e vazhdueshme të Islandës ndaj Kosovës, veçanërisht në procesin e rëndësishëm të anëtarësimit tonë në Këshillin e Evropës,” tha Presidentja Osmani.
Ajo gjithashtu potencoi rëndësinë e avancimit të marrëdhënieve bilaterale dhe bashkëpunimit në projekte me interes të ndërsjellë.
“Diskutuam për projekte konkrete që do të forcojnë lidhjet tona dhe do të sjellin përfitime për të dy vendet,” shtoi Osmani.
Nga ana e saj, Kryeministrja Frostadóttir riafirmoi mbështetjen e Islandës për Kosovën dhe shprehu gatishmërinë për thellimin e bashkëpunimit ndërkombëtar.
