Presidenti libanez Joseph Aoun ka informuar gazetarët në Pallatin Baabda pas raundit të katërt të bisedimeve të ndërmjetësuara nga Shtetet e Bashkuara mes Libanit dhe Izraelit.
Sipas Aoun, negociatat kanë prodhuar një deklaratë me “pika të forta në favor të Libanit”, duke e cilësuar procesin si një mundësi vendimtare për arritjen e një marrëveshjeje gjithëpërfshirëse dhe përfundimtare të armëpushimit.
Ai theksoi se “Kjo është mundësia e fundit për një armëpushim përfundimtar dhe gjithëpërfshirës.”
Aoun shtoi se, pasi Hezbollahu dhe palët e tjera të brendshme të paraqesin qëndrimet e tyre, Libani do të informojë palën amerikane për të ndërmarrë hapat e ardhshëm.
Sipas tij, “SHBA-të do të përcaktojnë kohën dhe mekanizmin e armëpushimit. Zbatimi mund të fillojë 24 orë pas njoftimit të SHBA-së për miratimin dhe marrjen e garancive dhe Trump do të shërbejë si garantues i drejtpërdrejtë.”
Ai vlerësoi gjithashtu rolin e ekipit negociator libanez të udhëhequr nga ambasadori Simon Karam, duke thënë se ai tregoi vendosmëri gjatë procesit.
“Ekipi negociator i Libanit, i udhëhequr nga ambasadori Simon Karam, tregoi vendosmëri. Karam pezulloi bisedimet dhe refuzoi të diskutonte ndonjë çështje tjetër derisa të sigurohej një armëpushim gjithëpërfshirës, duke bërë që Sekretari i Shtetit i SHBA-së, Marco Rubio, të ndërhynte. Bisedimet përfunduan me pranimin e kërkesës së Libanit”, tha ai, citon Al Jazeera.
Aoun tha gjithashtu se gjatë gjithë ditës së mërkurë dhe deri në orët e para të mëngjesit, Libani ka mbajtur kontakte të vazhdueshme me aktorë ndërkombëtarë dhe vendas për të forcuar armëpushimin, ndërsa disa vende mike kanë ushtruar presion në favor të arritjes së një marrëveshjeje.
Në lidhje me vendosjen e ushtrisë libaneze në zona të caktuara, Aoun tha se në “zonat pilot” ku forcat libaneze do të testojnë aftësinë e tyre për të siguruar territor pa praninë e aktorëve jo-shtetërorë, “Libani propozoi të fillonte me Zawtarin Lindor dhe Perëndimor së bashku me Yahmarin dhe Qalaat al-Shaqif, sepse ato janë pranë distriktit Nabatieh.”
