Prapaviat në merkato shpeshherë mund të jenë të nxehta me palët që mundohen të përfitojnë sa më shumë nga njëra-tjetra. Një rast ekstrem në negociata është regjistruar së fundmi ku i përfshirë është presidenti i klubit të La Liga-s, Rayo Vallecano, aty ku aktivizohet edhe lojtari i kombëtares shqiptare, Ivan Balliu.
Në orët e fundit të merkatos, presidenti Raul Martin Presa ishte në negociata për të transferuar Raul de Tomas, lojtarin e Espanyol. Presidenti ulet në tavolinë me përfaqësuesit dhe avokatin e lojtarit, teksa arrihet edhe akordi dhe gjithçka ishte drejt zyrtarizimit. Por, në çastet e fundit një nga avokatët kërkon më shumë para për komisionet dhe në këtë moment situata agravon.
Presidenti kërkon të godasë avokatin, por gabimisht e pëson agjenti i lojtarit që reagon. Një seri grushtash mbi presidentin nga ana e agjentit, aq sa duhet të mbërrijë policia për të vendosur rendin ndërsa presidenti Presa bëhet për spital.
Për fat, presidenti nuk kishte pësuar dëme të mëdha, ndërsa tratativa nga ana tjetër ishte shkatërruar plotësisht teksa publikimi i kësaj prapaskene lë një shije të hidhur ndërkohë që de Tomas, i mbetur jashtë projektit të Espanyol tashmë është duke kërkuar për një sistemim në Katar, Emiratet e Bashkuara Arabe apo Arabi Saudite ku merkato është ende e hapur.
