Presidentja e Kosovës, Vjosa Osmani, ka marrë pjesë në takimin inaugurues të Bordit të Paqes, i mbajtur në Washington D.C., me ftesë të Presidentit të Shteteve të Bashkuara të Amerikës, Donald Trump.
Sipas njoftimit të Presidencës, Kosova, si shtet bashkëthemelues përkrah Shteteve të Bashkuara të Amerikës, është afirmuar në arenën ndërkombëtare si kontribuuese në shërbim të paqes dhe sigurisë globale.
Gjatë takimit inaugurues, Presidentja Osmani ka zhvilluar diskutime me Presidentin Trump dhe me zyrtarë të lartë të administratës amerikane lidhur me bashkëpunimin bilateral dhe çështje të sigurisë ndërkombëtare.
Në kuadër të vizitës në Washington D.C., Osmani është pritur në takim nga Sekretari amerikan i Shtetit, Marco Rubio. Në këtë takim është diskutuar për hapa konkretë drejt thellimit të partneritetit strategjik Kosovë–SHBA, avancimin e integrimit të Kosovës në NATO, si dhe forcimin e bashkëpunimit në fushën e mbrojtjes dhe ekonomisë.
Presidentja është takuar gjithashtu me zyrtarë të tjerë të lartë amerikanë, përfshirë përfaqësues të Departamentit të Shtetit, Këshillit Kombëtar të Sigurisë dhe administratës presidenciale.
Në margjina të takimit inaugurues të Bordit të Paqes, Osmani ka zhvilluar takime dhe bashkëbisedime edhe me liderë të shumtë botërorë, përfshirë presidentë, kryeministra dhe ministra të jashtëm nga vende të ndryshme të Evropës, Azisë dhe Lindjes së Mesme.
Presidenca e Kosovës ka theksuar se kjo vizitë përfaqëson një hap të rëndësishëm në forcimin e rolit ndërkombëtar të Kosovës dhe në thellimin e partneritetit strategjik me Shtetet e Bashkuara të Amerikës.
