Të organizuar e me uniforma të UÇK-së.
Kështu, këtë të martë iu drejtuan Prekazit historikë.
Ky grup nxënësish i shkollës “ Ismet Jashari Komunanova”, bënë homazhe tek varrezat e Jasharajve për nderë të 17 shkurtit.
E nga stafi i shkollës, thonë se veshja e një uniforme të tillë është nder dhe privilegj.
“Është kënaqësi e jona të mbajmë këtë veshje, jo vetëm unë si mësimdhënëse, por edhe nxënësit e tonë e çdo familje duhet këtë uniform të mbajë në shtëpinë e tyre. Se sot festojmë pavarësinë e Kosovës shenjë e këtyre veshjeve dhe gjakut të tyre jemi këtu. Kjo do të thotë të ruajmë simbolin, të ruajmë gjakun e këtyre dëshmorëve që kanë rënë për liri”, u shpreh një mësimdhënëse.
E Prekazi këtë ditë të madhe u vizitua edhe nga më të vegjlit, që disa edhe ia thanë këngës.
Por kishte vizitorë që kishin ardhur nga Vlora në Prekaz dhe jo vetëm.
“E kishim planifikuar të vinim një ditë në Kosovë se kemi munguar, meqë ishte sot dita e protestës së madhe erdhëm, por nuk mund të rrinim pa ardh tek baca. Të na kthehen djemtë të pastër dhe me fitore”, u shpreh një vizitor.
E ndjenjë të veçantë vizita në këtë vend të rezistencës i jep vizitorit Ramiz Gashi.
“Për çdo festë pak është, por për çdo festë vijmë dhe gjashtë muaj me fol për këtë familje është pak. Edhe dijetarët më të mëdhenj nuk kanë mundur me fol atë se çka e meritojnë këta. Andaj veç lavdi ju qoftë këtyre nipave, e stërnipave dheu i lehtë ju qoftë këtyre”, ka thënë vizitori tjetër.
Për të bërë homazhe tek varrezat e Jasharajve erdhën edhe krerët e shtetit.
E të martë këtu u panë edhe fytyra të tjera publike.
Ku përveç urimeve për festën e pavarësisë, urime kishin edhe për krerët e UÇK-së që po mbahen në Hagë.
“Na lanë një mësim se liria është e qëndrueshme atëherë kur fitohet me luftë dhe gjakun e dëshmitarëve. Nga ky vend u uroj krerëve të UÇK-së këtë ditë të shënuar, të cilët padrejtësisht po mbahen atje nga një gjykatë politike krejtësisht e njëanshme. Shpresojmë dhe besojmë që verdikti përfundimtar gjykata të mos marrë vendim politik dhe t’i lirojë krerët e UÇK-së nga kjo akuzë e shpifur, nga kjo aktakuzë e përpunuar në Beograd”, kaz thënë Jashari.
Kurse, nga dega e Partisë Demokratike në Skenderaj, thanë se nga këtu do të vazhdojnë në marshin protestues “Drejtësi jo politikë”.
“Shfrytëzoj rastin të ja urojë në emër të Komunës së Skenderajt çdo qytetari të Republikës së Kosovës urime pavarësia shpresojmë që edhe ata që ishin pjesë përbërëse e lirisë së Kosovës përkatësisht të shtetit të Kosovës, presidenti Thaçi, Kadri Veseli dhe gjithë bashkëluftëtarët e tjerë të kthehen e bashkërisht ti vazhdojmë përvjetorët e tjerë në mënyrë të organizuar e me gëzim në familje”, u shpreh Nura.
Ndryshe, kujtojmë se shpallja e Pavarësisë së Kosovës u bë më 17 shkurt 2008.
