Institucionet paralele që drejtohen nga Serbia duhet në fund të integrohen në sistemin e Kosovës. Megjithatë, mënyra se si do të realizohet kjo është me rëndësi kyçe… Të gjitha ndryshimet që prekin komunitetin serb në Kosovë duhet të bëhen në konsultim me atë komunitet. Nuk ka alternativë“, ka thënë Anu Pratipati, e ngarkuara me punë në ambasadën e SHBA-së në Kosovë , në një intervistë për një grup mediash në gjuhën serbe.
Pothuajse një vit pas largimit të ambasadorit Jeffrey Hovenier, Pratipati është fytyra kryesore e ambasadës amerikane në Kosovë. Ajo, edhe në këtë intervistë për KoSSev, Kontakt Plus Radio, Radio Mitrovica e Veriut, Radio Kim dhe Radio Goraždevac, konfirmon se emërimi i një ambasadori mund të zgjasë.
„Mungesa e ambasadorit nuk do të thotë mungesë angazhimi të SHBA-së“, tha ajo, duke kujtuar vizitën e fundit të një zyrtari të lartë nga Byroja për Çështje Evropiane dhe Euroaziatike, Brendan Hanrahan.
Duke përsëritur se Shtetet e Bashkuara „kanë mbështetur me krenari rrugën e Kosovës drejt të qenit një shtet sovran, demokratik, multietnik dhe i begatë“, që është angazhuar t’i përfshijë këto parime në Kushtetutën e saj, ajo pranoi se SHBA-ja është e shqetësuar për veprimet e qeverisë së përkohshme dhe për hapat që kanë shtuar tensionet, veçanërisht kur bëhet fjalë për trajtimin e serbëve në Kosovë.
„Qeveria e përkohshme e kryeministrit Kurtit është përgjegjëse për sigurinë dhe begatinë e të gjithë banorëve të Kosovës, ndërsa Kushtetuta dhe ligjet e Kosovës garantojnë përfaqësimin e serbëve të Kosovës në institucionet e Kosovës. Ne presim që Qeveria e Kosovës të sigurojë që serbët në Kosovë të kenë mundësi të barabarta dhe të marrin pjesë të plotë në jetën politike dhe qytetare të Kosovës“.
Është përgjegjësi e Qeverisë së Kosovës që të merret me shqetësimet e serbëve në Kosovë.
Në të njëjtën kohë, pritet edhe nga serbët në Kosovë që të tregojnë përgjegjësi duke „ndihmuar në ndërtimin e një Kosove më stabile dhe më të begatë“.
„Kur nuk jeni në tryezë, të tjerët marrin vendime në vendin tuaj. Pjesëmarrja garanton rolin tuaj në formësimin e së ardhmes“, ka theksuar zyrtarja amerikane në intervistën për grupin e mediave në gjuhën serbe në Kosovë.
Ajo theksoi se çdo ndryshim që ndikon te serbët në Kosovë duhet të realizohet pikërisht në konsultim me serbët e Kosovës.
Nuk ka alternativë për këtë, dhe nuk ka proces të njëanshëm, shtoi ajo.
Me këtë ka pasur parasysh edhe fatin e dy institucioneve të mbetura të Republikës së Serbisë në Kosovë – atij arsimor dhe shëndetësor, për të cilat edhe një herë konfirmoi se do të duhet të përfshihen në sistemin e Kosovës.
