Konsulenti politik Xhevdet Pozhari ka komentuar bllokimin e vazhdueshëm të konstituimit të Kuvendit në Kosovë, duke e cilësuar situatën si një krizë të stisur, e jo të pakapërcyeshme.
Sipas tij, zgjidhja është e mundur dhe qëndron në vullnetin politik të partive, veçanërisht të Lidhjes Demokratike të Kosovës (LDK), e cila, siç thotë ai, po udhëhiqet nga një lider që nuk merr vendime të guximshme.
“Kjo çfarë po ndodhë është krizë artificiale, nuk është kjo një krizë që nuk ka zgjidhje. Janë të gjitha opsionet e zgjidhjeve në tavolinë. Vetëm varet se duan apo jo ta gjejnë gjuhën e përbashkët. Diskutohet shpesh që VV-ja është ajo që e ka hisen për gjetjen e zgjidhjes. I pëlqeu apo jo të tjerëve, ata e kanë propozuar një kandidat siç ju garantohet me Kushtetutë, e kanë bërë edhe një propozim për të bashkëqeverisur me LDK-në. Në fakt është kjo parti që siç duket udhëhiqet nga një frikacak, i cili nuk ka guxim të marrë vendime të mëdha, i cili e ka këtë pozitë të shtruar me tepihë të kuq, nuk është që është sprovuar shumë gjatë jetës së tij politike… LDK-ja është në udhëkryq të një identiteti të vërtetë”, ka deklaruar Pozhari në emisionin “Info Nata” në Tëvë1.
Ai ka përmendur edhe lëkundjet në deklaratat publike të kreut të LDK-së, Lumir Abdixhiku, duke e akuzuar për mospërputhje ndërmjet fjalëve dhe veprimeve.
“Abdixhiku ka shkruar se do të jep kontributin e tij për themelimin e institucioneve, ato janë fjalë të thëna publikisht. Më pas ato i ka ndryshuar, gjë që nuk është e pazakontë për politikanët ballkanas. VV-ja të bllokon ta kritikosh, për shkak se e ka propozuar kandidaten për kryetare dhe ka bërë oferta për koalicion, në këtë rast jo vetëm me LDK-në, por e kanë zbuluar se janë edhe me Nismën në negociata, kjo sigurisht që do ta prodhonte një qeveri më stabile”, ka shtuar ai.
Kriza për konstituimin e Kuvendit të Kosovës ka hyrë në muajin e dytë, ndërsa tentimi i 32-të për zgjedhjen e kryetarit të Kuvendit pritet të mbahet brenda 48 orëve./teve1.info/
