Pankartat me shkrimet ‘Mirë se vini në bashkësinë e komunave serbe’ ka më shumë se dy javë që janë vendosur në sheshin kryesor të Mitrovicës së Veriut.
Megjithatë, situata të premten në këtë qytet ishte shumë më e qetë në krahasim me ditën kur u vendosën këto billborde, një ditë pas tensioneve që u shkaktuan si kundërshtim ndaj vendosjes së reciprocitetit.
As në takimin e nivelit të lartë politik që u zhvillua në kuadër të dialogut mes Kosovës dhe Serbisë në Bruksel, nuk u arrit asnjë marrëveshje për çështjen e targave dhe dokumenteve të identifikimit. Më pak se dy javë nga fillimi i zbatimit të reciprocitetit për këto çështje, qytetarët serbë të veriut nuk kanë komentuar nëse ndihen të shqetësuar se mund të përsëriten tensionet e 31 korrikut.
Skender Sadiku, asamblist shqiptar në Mitrovicën e Veriut thotë se ka indikacione të forta që deri më 1 shtator të mos ketë nevojë për tensione, pasi që deri atëherë do të ketë marrëveshje.
“Është përfol edhe me të madhe që është vendosur edhe që ky poshtërimi që na u bë në kufi me letra do të ndërpritet dhe atëherë të themi kushtimisht posa ta heq masën Serbia nuk do të kërkojmë në kufi asnjë dokument. Po flitet me të madhe edhe që në Kosovë deri më 07 kanë arritur prefiksat e targave dhe me 08 do të jetë prefiksi për një solucion”, tha Sadiku.
E politikani opozitar serb nga Mitrovica e Veriut, kryetari i Iniciativës ‘Mbijetesa e Serbëve’, Aleksandër Arsenijeviq thotë se trazirat potenciale më 1 shtator në veri janë në dëm si të Kosovës ashtu edhe të Serbisë
“Unë mendoj që NATO dhe Unioni Evropian të dy palëve ua kanë bërë me dije çka guxojnë dhe çka nuk guxojnë të bëjnë. Të shohim sa janë të gatshëm ta luajnë këtë lojë që do të ishte e njëjtë me lojën e ruletit rus”, tha ai.
Arsenijeviq ka edhe një shpjegim se çfarë targash duhet të përdorin serbët lokalë në Kosovë.
“Ne dëshirojmë që të vendosim tabela neutrale, si ato që i kemi pasur përpara me KS. Kështu nuk do të ndahemi as me gjak, as me territor. Për veriun në rrethe diplomatike është përfolur numri 08 por kjo do të ishte jo e volitshme sepse serbët do të targetohen në jug”, shtoi ai.
Ndonëse Qeveria ka bërë të ditur se masa e reciprocitetit ndaj targave e dokumenteve serbe të identifikimit do të vendoset në shtator, një veprim i tillë po kundërshtohet nga partia kryesore serbe në vend e Beogradi zyrtar.
Raporti i gazetarit Gojart Jashari.
