Për ngritjen e kapaciteteve të Policisë Ushtarake të Forcës së Sigurisë së Kosovës, është realizuar kursi bazik i organizuar nga Komanda e Doktrinës dhe Stërvitjes, në bashkëpunim me instruktorët e Policisë Ushtarake.
FSK ka njoftuar se kursi bazik do të zgjasë 10 javë, teksa pjesëtarët do të trajnohen në teorinë mbi ligjet, rregulloret dhe aktet tjera në fuqi, përfshirë aspektin praktik të ekzekutimit të detyrave të Policisë Ushtarake.
“Në kuadër të ngritjes së kapaciteteve të Policisë Ushtarake të FSK-së, është realizuar Kursi Bazik për Polici Ushtarake të organizuar nga Komanda e Doktrinës dhe Stërvitjes, dhe realizuar në bashkëpunim me Instruktorët e Policisë Ushtarake. Kursi bazik zgjat 10 javë dhe pjesëtarët trajnohen në teorinë mbi ligjet, rregulloret dhe aktet tjera në fuqi si dhe aspektin praktik të ekzekutimit të detyrave të PU-së. Pjesëtarët gjatë trajnimit janë validuar në detyra të Policisë Ushtarake, si patrullime, ndalesa në trafik, reagimi ndaj mjeteve shpërthyese, menaxhimi i turmave, menaxhimi i kampit të robërve të luftës, neutralizimi i gjuajtësit aktiv”, thuhet në njoftimin e FSK-së.
Njëherit, komandanti i Policisë Ushtarake, nënkoloneli Besnik Selimi, ka përgëzuar të gjithë pjesëmarrësit, me ç’rast në bazë të vlerësimit nga instruktorët janë ndarë çmimet si: Akademik gjatë trajnimit Bazik për Policinë Ushtarake për OR3 Idriz Hoti dhe çmimi instruktor i dalluar për OR6, Faton Muli./teve1.info/.