Punimet për ndërtimin e urës së re ne veri të Mitrovicës po vazhdojnë.
Ura që do të mundësojë lëvizjen e veturave mbi lumin Ibër, tashmë ka marrë formën e saj.
E meqë punimet janë në fazën finale, në këtë vendpunishte janë marrë edhe masat e sigurisë.
Përgjegjësi i kompanisë Jahir Nimani tregon për Tëvë1 se që nga fillimi nuk kanë pasur probleme gjatë punimeve.
“Që nga fillimi kemi punuar me themelet që ne i quajmë pilotat, pastaj bazamentet, këmbët pozicionet e treve i kom punuar në punishten në pllacin tim ku punoj. Janë përgatitur atje, kallupimi, betonimi, kanë ndejtur deri në fazën e transportimit. I kemi vendosur trejët këtu tash kemi filluar me armirimin e soletës, pllakës përfundimtare, anësoret e urës, poshtë treve janë disa kallopime që e lidhin njëra tjetrën, deri këtu ka ecë sipas planit dinamik mundem me thënë që kemi arritë më shumë se sa që kemi menduar të punojmë”, ka thënë ai.
Që siguria të mbetet në nivel, zëvendësdrejtori i policisë për rajonin e veriut, Veton Elshani, thotë se krejt kjo po bëhet që mos të ketë incidente.
“Për arsyeje të sigurisë së punëtorëve që këta me kry punën e vet ashtu si duhet, në mënyrë që të mos hynë edhe dikush tjetër i paftuar për të punuar, policët e kryjnë detyrën e vet, ne e dimë se në veri kemi pas disa sfida, për të mos ardhe te ajo që me u marrë me pasoja, po merremi me parandalim në rast se ndodh diçka e tillë”, ka thënë Elshani.
Sipas përgjegjësit të kompanisë, ura për lëvizjen e veturave, pritet të lëshohet më 1 shtator.
“Mendojmë se këto ditë në javën e ardhshme të bëjmë betonimin e pllakës komplet. Tash jemi në përgatijen e armirimit dhe kallopimit anësoret e pllakës. Sipas kohës dhe planit edhe përgatitjeve që i kemi më 1 shtator kjo është e kalueshme”, shprehet Nimani.
Nimani theksoi se punimet po kryhen edhe gjatë natës.
Punimet për ndërtimin e urës që lidh veriun dhe jugun, kanë nisur më 3 korrik 2025.
