Prezantimi i raportit vjetor të punës i bëri bashkë në stacionin policor te Ferizajt.
Në këtë prezantim morën pjesë përfaqësues nga institucione të ndryshme ku u informuan për sukseset e arritura nga Drejtoria Rajonale e Policisë së Ferizajt.
Në statistikat e prezantuara u bë e ditur se ka pasur ngritje në zbulueshmërinë e rasteve dhe është arritur ulja e numrit të veprave penale si grabitje dhe dhunë në familje.
“Domethënë vrasje në vitin 2023 i kemi pasur një, ndërsa në vitin 2024 i kemi dy. Lëndimet e rënda kanë shënuar një ngritje, po ashtu edhe lëndimet e lehta diku 5.0 përqind, përderisa rastet që kanë të bëjnë me pasurinë e qytetarëve kanë shënuar rënie”, tha shefi i operativës rajonale, Major Avni Uruqi.
Si sukses u përmend edhe parandalimi i aksidenteve me fatalitet, ku në vitin 2023 ishin tetë apo 13 persona të vdekur, e në vitin që lamë pas 5 aksidente me 5 të vdekur.
E drejtori Rajonal, Faton Pllana tha se përkundër sfidave, kanë arritur që të menaxhojnë me sukses situatën e sigurisë në këto komuna.
“Falë bashkëpunimit të ngushtë mes institucioneve lokale, qendrore dhe ndërkombëtare kemi bërë hapa të rëndësishëm në përmirësimin e infrastrukturës policore, forcimin e sigurisë dhe besimit të qytetarëve në institucionet e rendit”, tha Pllana.
Për të arriturat e Policisë në nivel vendi, foli edhe drejtori i Departamentit të Rendit Publik në këtë institucion, Arbnesh Ajvazi.
“Rritja e numrit të rasteve, në disa vepra të caktuara penale është punë policore. P.sh armëmbajtje pa leje, posedimi i substancave narkotike është punë preventive që e bën Policia dhe kjo e rritë numrin e rasteve por ritja e nr të rasteve është në propoporcion të drejtë me punënë që ëbëhet në terren”, tha Ajazi.
Punën e zyrtarëve e lëvduan edhe përfaqësues nga institucionet e drejtësisë.
“Dëshiroj t’iu falënderoj për bashkëpunimin dhe përkrahjen që na i keni dhënë gjatë vitit 2024 sepse një pjesë e punës së Gjykatës varet edhe nga puna dhe asistenca juaj”, tha kryetari i Gjykatës Themelore në Ferizaj, Mustafë Tahiri.
“A do të jemi të kënaqur me këtë punë, a do të tentojmë që këtë punë apo angazhim ta forcojmë dhe shtojmë më shumë në zbulimin dhe zvogëlimin e veprave penale, gjithsesi se po”, tha kryeprokurori i Prokurorisë Themelore në Ferizaj, Burim Qerkini.
Nga kjo Drejtori u nda mirënjohje edhe për televizionin tëvë1, për bashkëpunimin e treguar gjatë këtij viti.
