Drejtori i përgjithshëm i Policisë së Kosovës, Gazmend Hoxha, së bashku me stafin e lartë menaxhues, ka pritur të martën një delegacion të nivelit të lartë nga Sllovenia.
Sipas njoftimit të Policisë, delegacioni slloven udhëhiqej nga ambasadori i Sllovenisë në Kosovë, Borut Blaj, dhe përfshinte gjithashtu Suzana Ivanović, Robert Črepinko dhe Robert Urek.
Gjatë takimit zyrtar, palët diskutuan për avancimin dhe thellimin e bashkëpunimit ndërinstitucional në fushën e sigurisë, me theks të veçantë në shkëmbimin e përvojave profesionale, forcimin e koordinimit ndërmjet institucioneve relevante dhe zhvillimin e kapaciteteve policore sipas standardeve evropiane.
Në njoftim thuhet se është vlerësuar lart bashkëpunimi i deritanishëm ndërmjet Policisë së Kosovës dhe institucioneve të Sllovenisë, ndërsa është shprehur gatishmëria për vazhdimin e mbështetjes dhe partneritetit në fusha me interes të përbashkët.
