Janë orët e vona të së enjtes.
Por për ta puna sapo ka filluar.
Kjo pasi që zyrtarët policorë të njësisë së trafikut në Rajonin e Ferizajt kanë shtuar masat në trafik në sezonin e verës.
Fillimisht ata marrin instruksionet e fundit nga plani operativ që kanë në këto ditë.
“Kur dihet që kemi numër të madh të sallave ku organizohen ahengje të ndryshme, diskoteka, kafiteri me muzikë live kështu që ne kemi me organizu sot pika kontrolli përveç kontrollës së përgjithshme, rutinore, edhe për alkool” , tha togerja Nerimane Hashani
Pasi marrin edhe udhëzimet e fundit, ata nisën drejt terrenit.
Me të arritur nisin edhe kontrollet e para.
Në zonën e shpejtësisë 40 kilometra në orë, një pjesëmarrës i trafikut tejkaloi këtë shpejtësi të lejuar.
Meqë janë orët e vona, te disa të rinj u bën edhe testet e alkoolit.
Te disa nga ta rezultoi se nuk ishin në ndikim të pijeve alkoolike.
Përpos tyre, kontrolle rutinore u bën edhe te disa vetura tjera të cilat dyshoheshin nga zyrtarët policorë.
Gjithë këto masa janë ndërmarrë për shkak të shtimit të pjesëmarrësve në trafik me ardhjen e mërgimtarëve.
“Kemi caktuar personel shtesë gjatë dy ndërrimeve pasdite dhe natën, personel policor si patrulla në këmbë, patrulla me veturë, gjithashtu pikat e kontrollit i kemi caktuar të jenë edhe t’i përfshijnë të gjitha rrugët që i mbulojmë ne si Drejtori Rajonale e Policisë e veçanërisht si njësi e trafikut rrugor”, shprehet Hashani.
Andaj shtimi i masave në trafik ka dhënë edhe rezultatet e veta.
“Prej datës 01 deri më sot kemi 143 aksidente total prej tyre 103 janë me lëndime kurse 40 janë me dëme, fatmirësisht aksidente me fatalitet nuk kemi. Kemi edhe tiketa ku janë shqiptuar gjithsejt katër mijë e 550. Gjithashtu kemi konfiskuar edhe 104 patentë shoferë prej tre muaj deri një vit për vozitje të rrezikshme, tejkalim të alkoolit tejkalim të shpejtësisë jashtë zonës urbane. Gjithashtu kemi konfiskuar gjithsej 223 motoçikleta, janë shqiptuar 313 tiketa në nivel të DRP kurse në nivel të trafikut ku unë e mbuloj këtë njësi kemi konfiskuar 110 motoçikleta dhe janë shqiptuar 199 tiketa për vozitës pa patentë shoferë, pa regjistrim, pa helmet”, thotë togerja.
Këto masa të shtuara pritet të vazhdojnë deri në fund të sezonës së verës ku fluksi i qytetarëve është më i madh.
